បន្ទាយមានជ័យ៖ប្រជាពលរដ្ឋជាង៤០គ្រួសាររស់នៅក្នុងភូមិមនោរម្យ ឃុំភ្នំតូច ស្រុកមង្គលបុរី ខេត្តបន្ទាយមានជ័យ កំពុងតែមានការព្រួយបារម្ភយ៉ាងខ្លាំងនៃការប្រឈមបាក់ស្រុតដីភូមិនិងប៉ះពាល់ដល់ដីលំនៅឋានរបស់ពួកគាត់ដែលសកម្មភាពធ្វើអាជីវកម្មជីកកកាយដីភ្នំតូចលក់យ៉ាងអាណាធិបតេយ្យរបស់ឈ្មួយកំពុងតែប្រើប្រាស់គ្រឿងចក្រជីកកកាយយកអាចម៌ដីលក់នៅជាប់ព្រំប្រទល់ដីលំនៅឋានរបស់គាត់។សកម្មភាពជីកកកាយដីភ្នំតូចពីសំណាក់មេឈ្មួញយ៉ាងដុះស្លែម្នាក់នៅភ្នំតូចនោះត្រូវបានប្រជាពលរដ្ឋរស់នៅក្នុងភូមិមនោរម្យបានប្រាប់ឱ្យដឹងកាលពីរសៀលថ្ងៃទី២១ ខែមេសាឆ្នាំ២០១៥ថាគេធ្វើឡើងជាយូរឆ្នាំមកហើយសកម្មភាពទាំងនេះគេមិនដែលឃើញមានក្រុមមន្ត្រីអង្គភាពជំនាញណាចុះមកត្រួតពិនិត្យលក្ខណៈបច្ចេកទេសអំពីផលប៉ះពាល់បរិស្ថាន និងផលប៉ះពាល់ដល់ផ្ទះប្រជាពលរដ្ឋនោះឡើយពោលគេបណ្តែបណ្តោយឱ្យការធ្វើអាជីវកម្មដីភ្នំតូចនេះតាមតែអំពើចិត្តរបស់ឈ្មួញដុះស្លែនោះ។គួរបញ្ជាក់ថារណ្តៅជីកកកាយយកអាចម៌ដីលក់គេមើលឃើញថាដូចជារណ្តៅបាយខុមដែលមានជម្រៅតាមការប៉ាន់ប្រមាណចាប់ពី៨ទៅ១០ម៉ែត្រ ។ សកម្មភាពនៃការជីកកកាយដីភ្នំតូចដែលគេចាត់ទុកថាជាភ្នំប្រវត្តិសាស្ត្រនៅពេលបច្ចុប្បន្ននេះគេឃើញភ្នំតូចបានបាត់បង់រូបរាងស្ថានភាពដើមហើយៗប្រែទៅជាភ្នំដែលមានជង្រុកជ្រៅនិងក្លាយទៅជាស្រះទឹកតូចធំនោះផងដែរ។សកម្មភាពនៃការធ្វើអាជីវកម្មដីភ្នំតូចរបស់ឈ្មួញដុះស្លែនោះដែរត្រូវបានប្រជាពលរដ្ឋដាក់ការសង្ស័យថាធ្វើឡើងខុសច្បាប់ដោយប្រើប្រាសសិទ្ធិអំណាចជាមេឃុំភ្នំតូចលក់ទ្រព្យសម្បត្តិធម្មជាតិរបស់រដ្ឋមានតម្លៃមហាសាលដើម្បីបម្រើផលប្រយោជន៍បុគ្គលផ្ទាល់ខ្លួនតែប៉ុណ្ណោះ។ជុំវិញបញ្ហានេះលោកជាសាង មេឃុំភ្នំតូចបានប្រាប់អ្នកយកព័ត៌មានឱ្យដឹងថាលោកមិនជឿទេការធ្វើអាជីវកម្មដីភ្នំនៅទីនោះមិនអាចប៉ះពាល់ដល់ប្រជាពលរដ្ឋជាង៤០គ្រួសារនោះឡើយ។ប្រសិនបើប៉ះពាល់ នោះមែនលោកនឹងចុះទៅដោះស្រាយភ្លាម។លោកប្រាប់ឱ្យដឹងទៀតថា អាជីវកម្មជីកកកាយដីភ្នំលក់នៅទីនោះមិនមែនជីកកកាយដីភ្នំនោះទេគឺជាដីដែលលោកទិញពីប្រជាពលរដ្ឋហើយធ្វើឡើងស្របច្បាប់តែបុណ្ណោះ។លោកគោស៊ុំ សារឿត អភិបាលខេត្តបន្ទាយមានជ័យបានប្រាប់អ្នកយកព័ត៌មានឲ្យដឹងថាអាជីវកម្មដីរបស់លោកមេឃុំភ្នំតូចគាត់បានស្នើសុំអាជ្ញាប័ណ្ណធ្វើអាជីវកម្មដល់ខេត្តនោះហើយក៏ប៉ុន្តែលោកពុំទាន់បានចុះហត្ថលេខាបញ្ជូនលិខិតស្នើសុំនោះទៅក្រសួងរ៉ែ និងថាមពលដោយទុករង់ចាំដោះស្រាយពិនិត្យមើលពីផលប៉ះពាល់បរិស្ថានសិន។លោកអភិបាលខេត្តបានបញ្ជាក់ឱ្យដឹងទៀតថា កន្លងមកលោកមេឃុំភ្នំតូចធ្វើអាជីវកម្មដីភ្នំតូចនោះគ្មានច្បាប់នោះទេ។ក្រសួងរ៉ែនិងថាមពលបច្ចុប្បន្នចេញច្បាប់រាល់ការធ្វើអាជីវកម្មដីខ្សាច់ រ៉ែ និងដីភ្នំ ជាដើម ត្រូវតែវាយតម្លៃពីផលប៉ះពាល់បរិស្ថានជាមុនសិនទើបអនុញ្ញាតិ្តឲ្យធ្វើអាជីវកម្មជាក្រោយ៕
ព័ត៌មានជាតិ
មតិយោបល់