ឥណ្ឌា៖ យោងតាមការចុះផ្សាយរបស់ CNN បានឲ្យដឹងថា រលកកម្ដៅ ដែលមានសីតុណ្ហភាពរហូតដល់ទៅជិត ៥០អង្សាសេ បានផ្តាច់ជីវិតប្រជាជន ឥណ្ឌារហូតដល់ទៅ ១.១១៨ នាក់ ក្នុងពេលមិនដល់មួយសប្តាហ៍។ ចាប់តាំងពីថ្ងៃចន្ទ សប្តាហ៍នេះមក អាកាសធាតុ បានឡើង កម្តៅខ្ពស់បំផុតរហូតទៅដល់ ៤៧អង្សាសេ ជាហេតុនាំមានមនុស្សស្លាប់ជាបន្តបន្ទាប់ ហើយចំនួននេះអាច នឹងកើនឡើង ច្រើនបន្ថែមទៀត។ ផ្នែកឧតុនិយមឥណ្ឌា បានអះអាងថា រលក កម្តៅដ៏ខ្លាំងនេះគឺបណ្តាលមកពីខ្យល់បក់មកពីតំបន់ក្តៅបំផុតនៃខេត្ត ស៊ីនដ៍ របស់ប្រទេស ប៉ាគីស្ថាន ឆ្លងកាត់មក តាមភាគខាងជើង និង កណ្តាល នៃប្រទេសឥណ្ឌា ហើយក៏រំកិលទៅកាន់តំបន់ភាគខាងលិចថែមទៀត។ គួរបញ្ជាក់ផងដែរថា អាកាសធាតុក្តៅបែបនេះ អាចនឹងបន្តអូសបន្លាយ រយៈពេល ពីរថ្ងៃទៅមុខ ហើយវាក៏មិនទាន់ បញ្ចប់នោះដែរ ព្រោះវាអាចនឹង មានរលកកម្តៅថ្មីៗទៀត៕