ពោធិ៍សាត់ៈ បុរសម្នាក់បានស្លាប់ និងម្នាក់បានរងរបួសធ្ងន់ ខណៈដែលពួកគេជិះម៉ូតូក្នុងស្ថានភាពស្រវឹងជោកជាំ ក្នុងល្បឿនលឿនដល់ផ្លូវកោងបានជ្រុលចង្កូតទៅបុករបងផ្ទះទាំងកំរោលតែម្ដង កាលពីរសៀលថ្ងៃទី៤ សីហា នេះ។

សាក្សីនៅកន្លែងកើតហេតុបានឲ្យដឹងថា នៅមុនពេលកើតហេតុគេឃើញម៉ូតូមួយគ្រឿងម៉ាកហុងដា C125 ស៊េរីឆ្នាំ2007 ពណ៌ខ្មៅ ពាក់ស្លាកលេខ ពោធិ៍សាត់ 1A-6108 បើកបរដោយឈ្មោះ សៀន រ៉េត ភេទប្រុស អាយុ៤៦ឆ្នាំ រស់នៅភូមិស្តុកខ្លា ឃុំរំលេច ស្រុកបាកាន និងអ្នករួមដំណើរឈ្មោះ ស៊ិន សាំង ភេទប្រុស អាយុ៤២ឆ្នាំ រស់នៅភូមិខ្វាវ ឃុំរំលេច ស្រុកបាកាន ធ្វើដំណើរក្នុងទិសដៅពីត្បូងទៅជើងក្នុងល្បឿនលឿន ក្នុងស្ថានភាពស្រវឹង លុះដល់ចំណុចផ្លូវកោង ក៏ជ្រុលចង្កូតបុករបងផ្ទះអ្នកភូមិធ្លាក់ចូលស្នាមភ្លោះ បណ្តាលឲ្យអ្នកទាំងពីររងរបួសធ្ងន់ ត្រូវបានគេដឹកបញ្ជូនទៅសង្រ្គោះនៅមន្ទីរពេទ្យបង្អែកខេត្តពោធិ៍សាត់ ហើយបុរសអ្នកបើកម៉ូតូបានដាច់ខ្យល់ស្លាប់៕