បាត់ដំបង៖ រឿងក្រុមហ៊ុនមួយដែលបាននិងកំពុងប្រមូលរ៉ែថ្មកែវ និងរ៉ែថ្មពណ៌នៅក្នុងភូមិសាស្ត្រ ឃុំតាគ្រាម ស្រុកបាណន់ ខេត្តបាត់ដំបង កំពុងធ្លាយរឿងមិនប្រក្រតីមួយដោយសារតែការរុករក និងប្រមូលយករ៉ែថ្មក្រោមដីមិនទាន់មានអាជ្ញាប័ណ្ណស្របច្បាប់នៅឡើយ ប៉ុន្តែគេបែរជាបានបោះទីតាំង យ៉ាងរឹងមាំដើម្បីតម្លើងគ្រឿងចក្រកែច្នៃថ្មដ៏មានតំលៃទាំងនេះនាំចេញទៅលើទីផ្សារសេរី។ គួរបញ្ជាក់ថាកន្លងមកអាជ្ញាធរ និងប្រជាពលរដ្ឋដែលរស់នៅត្រង់ចំនុចជួរភ្នំ150 ដែលស្ថិតនៅក្បែវត្តគិរីសិលាកែវ បានបញ្ចេញនូវការមិនពេញចិត្តយ៉ាងខ្លាំងទៅលើក្រុមហ៊ុនមួយដែលបានប្រើប្រាស់គ្រឿងចក្រធ្វើការឈូសឆាយទៅលើខ្នងភ្នំដោយដាក់គ្រាប់បំផ្ទុះដើម្បីប្រមូលយកនូវភោគផលរ៉ែធម្មជាតិដែលមានថ្មកែវយ៉ាងល្អប្រណិត ដោយគេបានដាក់ម៉ាស៊ីនកែច្នៃនៅនឹងជើងភ្នំនោះ ដើម្បីជ្រៀកដុំថ្មកែវអោយទៅជាបន្ទះៗងាយស្រួលក្នុងការនាំចេញទៅតាមមធ្យោបាយរបស់ពួកគេ ដែលធ្វើអោយព្រៃឈើដ៏ខៀវស្រងាត់នៅលើខ្នងភ្នំមួយចំនួនត្រូវវិនាសអន្តរាយ ឯតួភ្នំក៏ត្រូវខ្ទេចខ្ទីដោយអន្លើផងដែរ ព្រមទាំងធ្វើអោយដុំថ្មជាច្រើនហោះផ្លោងទៅតាមកំលាំងគ្រាប់ផ្ទុះ ទៅលើលំនៅដ្ឋានប្រជាពលរដ្ឋដែលនៅក្បែៗទីនោះថែមទៀតផង។ រយ:ពេលជាច្រើនខែក្នុងការប្រមូលយកថ្មកែវអស់ជាច្រើនដើម្បីធ្វើការនាំចេញរួចមក ស្រាប់តែក្រុមហ៊ុននេះបានផ្អាកសកម្មភាពក្នុងការប្រមូលថ្មកែវ ដោយបានលើកគ្រឿងចក្រចេញពីទីតាំងនេះទៅឈរជើងជាថ្មីនៅចំនុចជួរភ្នំអម្ពរ ស្ថិតនៅខាងក្រោយភ្នំតាគ្រាម ក្នុងភូមិប៉ោយស្វាយ ឃុំតាគ្រាមស្រុកបាណន់ ព្រមទាំងបានចាក់គ្រឹះយ៉ាងរឹងមាំដើម្បីបំពាក់គ្រឿងចក្រកែច្នៃ ព្រោះទីតាំងនេះមានរ៉ែថ្មធម្មជាតិមួយបែបទៀតជាប្រភេទថ្មពណ៌ត្របែកព្រៃ ហើយទីតាំងដែលគេសំងំឈរជើងនេះវាមាន លក្ខណ:យ៉ាងល្អប្រសើសំរាប់ពួកគេព្រោះវាស្ថិតនៅខាងក្រោយជួរភ្នំតាគ្រាមឯណោះ។ បច្ចុប្បន្នអាជីវកម្មរបស់ក្រុមហ៊ុននេះកំពុងដំណើរការជាបណ្តើរៗហើយដោយគេបានធ្វើការ គាស់រំលើងដុំថ្មធំៗដែលមានពណ៌យ៉ាងស្រស់ស្អាតទំលាក់មកនៅក្បែជើងភ្នំដើម្បីទុកសម្រាប់ធ្វើការ កែច្នៃនៅពេលដែលគេបំពាក់គ្រឿងចក្ររួចរាល់ ដែលនេះជាលើកទីពីរហើយសម្រាប់ក្រុមហ៊ុនមួយនេះ ក្នុងការបំផ្លាញព្រៃឈើ ដើម្បីប្រមូលយកភោគផលរ៉ែធម្មជាតិដោយមិនទាន់មានច្បាប់ទម្លាប់ត្រឹមត្រូវដែលក្រុមហ៊ុននេះគឺជារបស់អ្នកមានឥទ្ធិពលម្នាក់។ កន្លងអ្នកសារព័ត៌មានបានធ្វើការសម្ភាសន៍ជាមួយលោកជឺ ឈាង ប្រធានមន្ទីររ៉ែ និងថាមពលខេត្ត ដោយលោកបានអះអាងថា ក្រុមហ៊ុននេះគេមានអាជ្ញាប័ណ្ណត្រឹមត្រូវក្នុងការធ្វើអាជីវកម្មថ្មកែវ និងថ្មព៌ណ។ប៉ុន្តែថ្មីៗនេះ នាយកដ្ឋានរ៉ែ និងថាមពល បានផ្តល់ព័ត៌មានដល់កាសែតក្នុងស្រុកថា កន្លងមកដែលក្រុមហ៊ុនមួយនេះបានធ្វើអាជីវកម្មរ៉ែថ្មកែវគឺពិតជាមានអាជ្ញាប័ណ្ណយ៉ាងពិតប្រាកដ ប៉ុន្តែ ក្រោយមកនាយកដ្ឋានបានបញ្ជាអោយផ្អាកសកម្មភាពសិន ដោយសារតែផលប៉ះពាល់ទៅលើ ប្រជាពលរដ្ឋក្នុងមូលដ្ឋាន និងព្រៃឈើយ៉ាងច្រើនសន្ធឹកសន្ធាប់បែបនេះ។ នាយកដ្ឋានរ៉ែ និងថាមពល បានសង្កត់ធ្ងន់ថា ទីតាំងថ្មីដែលក្រុមហ៊ុននេះកំពុងធ្វើ សកម្មភាព គឺជាទីតាំងដែលមានអាជ្ញាប័ណ្ណរបស់ក្រុមហ៊ុនថៃ ប៉ុន្តែបច្ចុប្បន្នអាជ្ញាប័ណ្ណនេះបានអស់សុពលភាព ជាយូរមកហើយ ទើបគេឃើញក្រុមហ៊ុននេះបាននិងកំពុងរត់ការសុំយកអាជ្ញាប័ណ្ណនេះមកធ្វើអាជីវកម្មបន្តដោយមិនទាន់ទទួលបាននូវសេចក្តីសម្រេច ឬមានការអនុញ្ញាតិពីក្រសួងនៅឡើយទេ ដូច្នេះមានន័យថា ក្រុមហ៊ុនមួយនេះកំពុងតែល្មើសទៅលើផ្លូវច្បាប់ហើយ ដែលហ៊ានដំណើរការធ្វើអាជីវកម្មទាំងមិនទាន់មានច្បាប់អនុញ្ញាតិត្រឹមត្រូវផងនោះ ហើយក៏កំពុងបង្កនូវផលប៉ះពាល់ដល់ភោគផលរ៉ែធម្មជាតិក្រោមដី និងព្រៃឈើនៅតាមជួរភ្នំដែលប្រជាពលរដ្ឋនៅតាមបណ្តាសហគមន៍កំពុងតែអភិរក្សយ៉ាងល្អផងនោះ។ចំពោះការចាត់វិធានការតាមផ្លូវច្បាប់របស់នាយកដ្ឋានរ៉ែ និងថាមពល ទៅលើក្រុមហ៊ុនមួយនេះយ៉ាងណានោះ គឺមិនទាន់ដឹងនៅឡើយទេ៕
ព័ត៌មានជាតិ
មតិយោបល់