ក្រោមក្រសែភ្នែក ​ទស្សនិកជន​រាប់ម៉ឺន នាក់ ដែលបានទៅទស្សនាផ្ទាល់នៅពហុកីឡដ្ឋាន បាន​ចាប់អារម្មណ៍​យ៉ាងខ្លាំង ​ទៅលើទម្រង់លេងឈុតធំ របស់កម្ពុជា ដោយលេងមិនកើត ខណៈដែលខ្លួនជាម្ចាស់ផ្ទះ ទៅហើយ ​បណ្តោយឲ្យភ្ញៀវ លុតរបស់ដល់ទៅ ៤ ទល់នឹង ០ ។​

ជាមួយនឹងទម្រង់លេង​ដ៏គ្មានប្រសិទ្ធភាពនេះ បានធ្វើឲ្យទស្សនិកជន ដែលខំចំណាយពេល វេលា និងថវិការផ្ទាល់ខ្លួន ដើម្បីមកគាំទ្រ តែផ្ទុយទៅវិញ បែរ​ជា​ធ្វើឲ្យ ​អ្នកគាំទ្រ​ខឹងសម្បារទៅវិញ ។ ទស្សនិកជនជាច្រើន បាន​​​ធ្វើការវាយតម្លៃ ថា ៖ គេខំចំណាយទាំងទឹកចិត្ត និងថវិការ មកគាំទ្រ តែ​ទម្រង់លេងរបស់ ឈុតធំ លេងមិនដឹងជាស្អី ដូចកីឡាករ​ទើបតែ​ទទួលការហ្វឹកហាត់ ជាពិសេស ផ្នែកក្បែរការពារតែ ម្តង មាឌធំៗ តែដូចឃ្លោក ។​

ជាមួយនឹងពាក្យរិះគន់នេះ នៅមានទស្សនិកជន ជាច្រើនដែលទៅទស្សនា​ផ្ទាល់នៅពហុកីឡដ្ឋាន កាលពីល្ងាចថ្ងៃទី ១១ ខែ មិថុនា ម្សិលមិញនេះ ក៏បានបន្ទរថា ៖ បើនៅតែចឹងៗ កម្ពុជា គ្មាន​ថ្ងៃ ​ទៅមុខនោះទេ លើវិស័យកីឡា ក៏ប៉ុន្តែ​អ្វីដែលសរសើរនោះ គឺទម្រង់លេងរបស់ U23 វិញទេ ​គឺមានលទ្ធភាព​ជាង ដោយទម្រង់លេងរបស់ពួកគេស៊ីចង្វាក់ បើទោះបីជាចំណុចខ្វះខាត ខ្លះនៅមានក្តី ។
ទន្ទឹមជាមួយនឹងគ្នានេះដែរ អ្នកលេងហ្វេសប៊ុកខ្លះក៏បានបញ្ចេញមតិថា បើការប្រកួតនៅថ្ងៃទី ១៦ ខាងមុខ ​បើមាន កីឡាករ U23 ចូលរួមលេងខ្លះៗ អាចនឹងមានសង្ឈឹមច្រើនជាង តែបើដាក់ឈុតធំ បន្តទៀត កម្ពុជានៅតែចាញ់ ខណៈលេងក្នុងទឹកដី ​មិនទាន់ស្គាល់ពាក្យថា​ឈ្នះនោះ ៕​