ឯកឧត្តម អ៊ូច ភា អភិបាល នៃគណ:អភិបាលខេត្តតាកែវ និងមន្រ្តីជំនាញពាក់ព័ន្ធ បានអញ្ជើញចុះពិនិត្យសកម្មភាពការកែលម្អតាមដងផ្លូវចូលក្រុងដូនកែវ និងសិក្សាគម្រោងស្ថាបនារូបសំណាក បង្កង និងរូបសំណាក ពងទាកូន ដែលជាមុខម្ហូបដ៏មានសក្កានុពល ប្រចាំខេត្តតាកែវ។
ក្នុងឱកាសចុះពិនិត្យនោះដែរ ឯកឧត្តម បានណែនាំដល់ក្រុមការងារស្ថាបនាទាំងអស់ ត្រូវធ្វើស្របទៅតាមស្ដង់ការបច្ចេកទេសឱ្យបានត្រឹមត្រូវ និងបានឆាប់រហ័ស សម្រាប់លើកសម្រស់ ក៏ដូចជាសោភ័ណ្ឌក្រុងដូនកែវ។
សម្រាប់គម្រោងស្ថាបនា រូបសំណាក បង្កង និងរូបសំណាក ពងទាកូន ក៏ត្រូវបាន ឯកឧត្តមអភិបាលខេត្ត បានណែនាំដល់មន្រ្តីជំនាញពាក់ព័ន្ធទាំងអស់ ត្រូវសិក្សាអំពីគម្រោងនេះឱ្យបានជាក់លាក់ និងទទួលយករាល់មតិរបស់សាធារណ:ទាំងអស់មកពិនិត្យមើល ទៅតាមស្ថានភាពជាក់ស្ដែង។
លោក ណុប នី ប្រធានមន្ទីរសាធារណ:ការ និងដឹកជញ្ជូនខេត្តតាកែវ បានឱ្យដឹងថា ចំពោះការសង់រូបសំណាក់សម្គាល់ខេត្តតាកែវ មានរូប ព្រះវិស្ណុ គឺត្រូវបានអាជ្ញាធរសង់រួចរាល់ហើយ។ ដោយឡែកចំពោះការសិក្សាគម្រោង ស្ថាបនា រូបសំណាក់ បង្កង និងរូបសំណាក់ ពងទាកូន គឺគ្រាន់តែចង់បង្ហាញ ឱ្យបានដឹងអំពីមុខម្ហូបដ៏ពេញនិយម របស់ខេត្តតាកែវប៉ុណ្ណោះ៕
ប្រភព៖ រដ្ឋបាលខេត្តតាកែវ
មតិយោបល់