ដើម្បីបង្កើនសម្ពាធលើរបបយោធាដែលធ្វើរដ្ឋប្រហារកាលពីថ្ងៃទី១ ខែកុម្ភៈ សហរដ្ឋអាមេរិកនិងអង់គ្លេស បានដាក់ទណ្ឌកម្មលើក្រុមហ៊ុនធំៗគ្រប់គ្រងដោយយោធាដោយក្រុងវ៉ាស៊ីនតោន ការហៅការដាក់ទណ្ឌកម្មថា ជាការឆ្លើយតបទៅនឹង«ការបង្ក្រាបឃោរឃៅ»របស់យោធា។
![](https://i0.wp.com/domneng.news/wp-content/uploads/2021/03/photo_2021-03-27_10-03-04.jpg?resize=1200%2C800&ssl=1)
បណ្តាញព័ត៌មានរាយការណ៍ថា ការតវ៉ាដោយដុតភ្លើងទៀនបំភ្លឺ បានកើតឡើងនៅទូទាំងប្រទេសពេញមួយយប់នៅតំបន់ Mandalay និង Sagaing ហើយនឹងនៅរដ្ឋការ៉ែន និងរដ្ឋឈិន។
សាក្សីបាននិយាយថា ក្រុមមនុស្សប្រមាណ១០០នាក់ បានវាយស្គរតវ៉ានៅទីប្រជុំជនSule នៃទីក្រុងរ៉ង់ហ្គូន មុនពេលកម្លាំងសន្តិសុខដេញ។ បាតុករម្នាក់ឈ្មោះ Phone Naing ប្រាប់ទីភ្នាក់ងារព័ត៌មាន Reuters ថា «សង្រ្គាមនេះមិនចប់ទេ លុះត្រាយើងឈ្នះ។ ខ្ញុំនឹងប្រឆាំងនឹងពួកគេតាមដែលយើងអាចធ្វើបាន»។
បណ្តាញព័ត៌មាន Mizzima បានរាយការណ៍ថា នៅMandalay ដែលជាទីក្រុងធំទី២របស់មីយ៉ាន់ម៉ា ក្រុមអ្នកតវ៉ាបានដើរក្បួននៅព្រឹកថ្ងៃសុក្រ នៅមុខបដាដែលសរសេរថា «ចលនាស៊ីវិលប្រឆាំង»។
![](https://i0.wp.com/domneng.news/wp-content/uploads/2021/03/photo_2021-03-27_10-02-58.jpg?resize=968%2C645&ssl=1)
ក្រុមអ្នករៀបចំបាតុកម្ម បានអំពាវនាវឱ្យមានការតវ៉ាយ៉ាងទូលំទូលាយនៅថ្ងៃសៅរ៍ ដែលជាទិវាកងកម្លាំងប្រដាប់អាវុធរំឭកការចាប់ផ្តើមតស៊ូប្រឆាំងការកាន់កាប់របស់ជប៉ុននៅឆ្នាំ១៩៤៥។
នៅមីយ៉ាន់ម៉ា មានការតវ៉ាស្ទើរតែរាល់ថ្ងៃ ចាប់តាំងពីពេលកងទ័ពបានផ្តួលរំលំរដ្ឋាភិបាលជាប់ឆ្នោតរបស់លោកស្រី អ៊ុងសាន ស៊ូជី និងបង្កើតរបបយោធា។
យ៉ាងហោចណាស់មនុស្ស៣២០នាក់ ត្រូវបានសម្លាប់បន្ទាប់ពីការបង្ក្រាប។ នេះបើយោងតាមតួលេខរបស់ក្រុមសកម្មជនសមាគមជួយអ្នកទោសនយោបាយ។ យ៉ាងហោចណាស់២៥ភាគរយនៃអ្នកទាំងនោះ ស្លាប់ដោយការបាញ់ចំក្បាល៕
![](https://i0.wp.com/domneng.news/wp-content/uploads/2021/03/photo_2021-03-27_10-02-55.jpg?resize=976%2C549&ssl=1)
ប្រភព៖ voanews
មតិយោបល់