តាមពិតទៅ កាលពីខែមករា ដើមឆ្នាំ ២០២១នេះ ការឆ្លងរាលដាលខ្លាំងនៃជំងឺកូវីដត្រូវបានគ្រប់គ្រងដោយរដ្ឋាភិបាលឥណ្ឌាគួរឲ្យកត់សម្គាល់។ ក៏ប៉ុន្តែបន្តិចក្រោយមក ស្ថានភាពកូវីដនៅឥណ្ឌាបានវិវត្តន៍កាន់តែអាក្រក់ទៅៗ រហូតជាប់កំណត់ត្រាពិភពលោក ខាងមានអ្នកឆ្លង និងអ្នកស្លាប់ប្រចាំថ្ងៃខ្ពស់ផុតគេ។
គេសង្កេតឃើញថា ករណីឆ្លងកូវីដនៅក្នុងប្រទេសឥណ្ឌា ផ្ទុះកើនមកវិញខ្លាំងយ៉ាងឆាប់រហ័សក្នុងរយ:ពេលមួយខែកន្លងមកនេះ។ មូលហេតុចម្បងនៅពីក្រោយរលកឆ្លងដ៏ធំនេះ ទី១ គឺដោយសារវិធានាការសុវត្ថិភាពធូររលុងរបស់អាជ្ញាធរឥណ្ឌា ដែលបានអនុញ្ញាតឲ្យមនុស្សម្នាណែនណាន់តាន់តាប់រាប់លាននាក់ ចូលរួមក្នុងពិធីបុណ្យសាសនាហិណ្ឌូមួយនៅឯទន្លេគង្គារ កាលពីថ្ងៃទី១២ មេសា ២០២១។ ចំណែក មូលហេតុទី២ គឺមេរោគបំប្លែងខ្លួនថ្មី ដែលមានចំនួនច្រើន យ៉ាងហោច ៦ នៅក្នុងប្រទេសឥណ្ឌា។
ចំពោះ ការអនុញ្ញាតឲ្យប្រជាជនចំនួនដល់រាប់លាននាក់ ប្រជ្រៀតគ្នាណែនចង្អៀត ចូលរួមក្នុងពិធីបុណ្យសាសនា រដ្ឋាភិបាលឥណ្ឌាទទួលរងនូវការរិះគន់ខ្លាំងថាបានព្រងើយកន្តើយ គ្មានដាក់ការប្រុងប្រយ័ត្នខ្ពស់ រក្សាគម្លាតទាល់តែសោះ រហូតបណ្តាលឲ្យផ្ទុះករណីឆ្លងខ្លាំងប្រៀបដូចរលកយក្សស៊ូណាមីដូច្នោះ។
ប្រភព៖ RFI
មតិយោបល់