ភ្នំពេញ: រដ្ឋមន្ត្រីក្រសួងបរិស្ថាន និងប្រតិភូ រួមដំណើរជាច្រើនរូបទៀត រួមមានលោក សរ សុវណ្ណ រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ លោក គន់ គីម អគ្គបញ្ជាការរងកងយោធ​ពលខេមរភូមិន្ទ និងលោក ប៊ុន លើត អភិបាលនៃគណ:អភិបាលខេត្តកោះកុង បានចុះបំពេញបេសកកម្មនៅ​ស្រុក​គិរីសាគរ ខេត្តកោះកុង ដើម្បីប្រជុំពិភាក្សាជាមួយអជ្ញាធរមូលដ្ឋាន និងប្រជាពលរដ្ឋដែលទទួលរងផលប៉ះពាល់ពី​គម្រោង​វិនិយោគរបស់ក្រុមហ៊ុន Union Development Group Co., Ltd ។

យោងតាមគេហទំព័រក្រសួងបរិស្ថានបង្ហាញថា ដំណើរចុះបំពេញបេសកកម្មនោះ ក្នុងគោលបំណងដោះស្រាយផល​ប៉ះពាល់ដែលនៅសេសសល់ និងរកឲ្យឃើញពីមូលហេតុពិតប្រាកដនៃផលប៉ះពាល់ទាំងនោះ ក៏ដូចជាស្តាប់អំពី​កង្វល់ និងបញ្ហានានារបស់ប្រជាពលរដ្ឋ ព្រមទាំងទទួលយកសំណូមពរ និងសំណើរបស់ពួកគាត់ ដើម្បីពិភាក្សារក​ដំណោះស្រាយសមស្របជូនពួកគាត់៕