យ៉ាងហោចណាស់ក៏មានមនុស្ស០២នាក់បានស្លាប់និង០១នាក់រងរបួសធ្ងន់ នៅក្នុងហេតុកការណ៍គ្រោះថ្នាក់ចរាចរណ៍កើតឡើង ចំនួន២ករណីជាបន្តបន្ទាប់ ដោយម៉ូតូបុកជាមួយគោយន្តកន្ត្រៃនិងរថយន្តបុកជាមួយគោយន្តកន្ត្រៃ នៅក្នុងភូមិរហាល ឃុំរហាល ស្រុកព្រះ​នេត្រព្រះ ខេត្តបន្ទាយមានជ័យ ។

លោកវរសេនីយ៍ឯក មាស ប្ញទ្ធី អធិការនគរបាលស្រុកព្រះនេត្រព្រះ បានឲ្យដឹងងថា៖ នៅវេលាម៉ោង០៧និង២០នាទីយប់ថ្ងៃទី០១ ខែមិថុនា ឆ្នាំ២០២១ នៅចំណុចបង្គោលខ្សែភ្លើងលេខ០៣៧៧ លើកំ ណាត់ផ្លូវជាតិលេខ៦ ស្ថិតក្នុងភូមិរហាល ឃុំរហាល ស្រុកព្រះនេត្រព្រះ ខេត្តបន្ទាយមានជ័យ មានគ្រោះថ្នាក់ចរាចរណ៍កើតឡើង ដោយម៉ូតូបុកជាមួយគោយន្តបណ្តាលឲ្យស្លាប់០១នាក់និងរងរបួសធ្ងន់០១នាក់ ។

លោកវរសេនីយ៍ឯកមាស ប្ញទ្ធី បានបញ្ជាក់ថា៖ អ្នកបើកបរគោយន្តកន្ត្រៃ ឈ្មោះ ផាត ប៊ុននី ភេទប្រុស អាយុ៤៣ឆ្នាំរស់នៅភូមិរហាល ឃុំរហាល ស្រុកព្រះនេត្រព្រះ ខេត្តបន្ទាយមានជ័យ បើកបរក្នុងទិសខាងកើតទៅ ទិសខាងលិច មកដល់ចំណុចកើតហេតុខាងលើបានបត់ឆ្លងផ្លូវទៅខាងឆ្វេងដៃ ដើម្បីប្តូរទិស ស្របពេលនោះមានម៉ូតូ ០១គ្រឿងម៉ាក ហុងដាទ្រីម C125 ពណ៍ខ្មៅសេរីឆ្នាំ២០២០ពាក់ផ្លាកលេខ បន្ទាយមានជ័យ 1V-7980 បើកបរដោយឈ្មោះ រស់ សាវង្សភេទប្រុសអាយុ ៥៣ឆ្នាំរស់នៅភូមិ ជើងវត្ត ឃុំព្រះនេត្រព្រះ ស្រុកព្រះនេត្រព្រះ ខេត្តបន្ទាយមានជ័យ (សង្ស័យមានជាតិស្រវឹង)និងមានអ្នករួមដំណើ០១នាក់ ឈ្មោះ ហួត ស្រួចភេទប្រុស អាយុ៥៥ឆ្នាំ រស់នៅភូមិប៉ោយស្វាយ ឃុំរហាល ស្រុកព្រះនេត្រព្រះ ខេត្តបន្ទាយមានជ័យ បើកបរមកពីទិសខាងលិចទៅទិសខាងកើត ក៏បានបុកចំកណ្ដាលទ្រុងគោយន្តចំហៀងខាងស្តាំបណ្តាលឲ្យក្រឡប់ អ្នកបើកបរម៉ូតូរងរបួសធ្ងន់ ក្រោយមកបានស្លាប់នៅមន្ទីរពេទ្យបង្អែកខេត្ត មិត្តភាពកម្ពុជា-ជប៉ុន នៅស្រុកមង្គលបូរី និងអ្នករួមដំណើររងរបួសធ្ងន់ អ្នកបើកបរគោយន្តរបួសស្រាល ម៉ូតូខូចផ្នែកខាងមុខធ្ងន់។ មូលហេតុបង្កឲ្យមានគ្រោះថ្នាក់ អ្នកបើកបរគោយន្តប្តូរគន្លងខ្វះការប្រុងប្រយ័ត្ន ចំណែកអ្នកបើកម៉ូតូមានល្បឿនលឿន សង្ស័យមានជាតិស្រវឹង។

មួយករណីទៀត នៅលើកំណាត់ផ្លូវជាតិលេខ៦ ចម្ងាយ៥០ម៉ែត្រខាងកើតប៉ុស្តិ៍រដ្ឋបាល ឃុំរហាលស្ថិតក្នុងភូមិរហាល ឃុំរហាល ស្រុកព្រះនេត្រព្រះ នេះដែរ មានគ្រោះថ្នាក់ចរាចរណ៍កើតឡើង រវាងរថយន្តបុជាមួយគោយន្តកន្ត្រៃ នៅវេលាម៉ោង០៣ទាបភ្លឺ ថ្ងៃទី០២ខែមិថុនា ឆ្នាំ២០២១ បណ្តាលឲ្យស្លាប់០១នាក់ នៅមន្ទីរពេទ្យ ។

លោកវរសេនីយ៍ឯក មាស ប្ញទ្ធី អធិការនរបាលស្រុកព្រះនេត្រព្រះ បានឲ្យដឹងថា៖ដំបូងមានរថយន្ត០១គ្រឿងម៉ាកHINOពណ៍សពាក់ផ្លាកលេខ ពាក់ផ្លាកលេខ ភ្នំពេញ3B-8905(អ្នកបើកបរក្តាប់អត្តសញ្ញាណមិនបានចុះរត់គេចខ្លួនបាត់)បើកបរពីទិសខាងកើតទៅទិសខាងលិច មកដល់ចំណុចកើតហេតុខាងលើបានបុកនិងគោយន្តកន្រ្តៃដែលកំពុងបើកបរស្របទិសគ្នានៅពីមុខដោយមានភ្លើងបំភ្លឺក្រោយ ចំពីខាងក្រោយពេញទំហឹង បណ្តាលឲ្យឈ្មោះម៉ោញ មេន ភេទប្រុសអាយុ២៣ឆ្នាំ នៅភូមិថ្មី ឃុំផ្កាឈូក ស្រុកអង្គរជុំ ខេត្តសៀមរាប រងរបួសធ្ងន់ ក្រោយមកបានស្លាប់នៅមន្ទីរពេទ្យបង្អែកខេត្ត មិត្តភាព កម្ពុជា ជប៉ុន នៅស្រុកមង្គលបូរី ។អ្នកបើកបររថយន្ត ឈ្មោះជឿន វាសនា ភេទប្រុសអាយុប្រហែល ២៩ឆ្នាំ នៅខេត្តកំពង់ចាម រត់គេចខ្លួន វត្ថុតាងគោយន្តនិងរថយន្តខូចស្រាល។មូលហេតុ បណ្តាលមកពីអ្នកបើកបរ រថយន្តមានល្បឿនលឿនខ្វះការប្រុងប្រយ័ត្ន ។ចំពោះវត្ថុតាងបង្កគ្រោះថ្នាក់ទាំង០២ករណីនេះ កម្លាំងជំ​នាញ បានយកមករក្សាទុកនៅអធិការដ្ឋាននគរបាលស្រុកព្រះនេត្រព្រះ ដើម្បីរងចាំធ្វើការដោះស្រាយ នៅពេលក្រោយ ចំណែកសពជនរងគ្រោះទាំអ០២នាក់ ត្រូវបានក្រុមគ្រួសាររៀបចំធ្វើបុណ្យតាមប្រពៃណី ៕

ប្រភព៖​ អគ្គស្នងការដ្ឋាននគរបាលជាតិ