ពិធីប្រគល់និងទទួលកែវផ្ទុកដំណក់ប្រេងដំបូងរបស់កម្ពុជា ដែលនឹងរៀបចំនៅថ្ងៃទី ៩ ខែមិថុនា ឆ្នាំ២០២១ ខាងមុខ នឹងត្រូវធ្វើឡើងក្រោមវត្តមានរបស់សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងឯកឧត្តម ស៊ុយ សែម រដ្ឋមន្ត្រីក្រសួងរ៉ែ និងថាមពល នៅឯវិមាន ឈ្នះ ឈ្នះ។
សូមរម្លឹកថា កម្ពុជា បានចាប់ផ្តើមដំណើរការបូមប្រេងរបស់ខ្លួនដំបូងក្នុងប្រវត្តិសាស្ត្រ កាលពីថ្ងៃទី ២៩ ខែធ្នូ ឆ្នាំ២០២០ ស្ថិតនៅតំបន់ប្លុក A នៃឈូងសមុទ្រកម្ពុជា ដោយក្រុមហ៊ុន Kris Energy ដែលបានខួងប្រេងចេញពីបាតសមុទ្រ ក្នុងខេត្តព្រះសីហនុ។ ថ្ងៃដែលកម្ពុជាទទួលបានដំណក់ប្រេងដំបូងនេះ គឺចំថ្ងៃខួប ២២ ឆ្នាំ នៃការដាក់ចេញនយោបាយឈ្នះ ឈ្នះ របស់សម្តេចតេចជោ កាលពីថ្ងៃទី ២៩ ខែធ្នូ ឆ្នាំ ១៩៩៨។
បើតាមអគ្គនាយកនៃអគ្គនាយកដ្ឋានប្រេងកាត បច្ចុប្បន្ននេះ ក្រុមហ៊ុន Kris Energy កំពុងដំណើរការផលិតកម្មបូមប្រេងនៅលើអណ្តូងទាំង៥ កន្លែង ដោយផលិតកម្មប្រចាំថ្ងៃ ក្នុងរង្វង់ ២ពាន់ប៉ារ៉ែលក្នុងមួយថ្ងៃ ហើយនៅក្នុងពេលឆាប់ៗខាងមុខនេះ ក្រុមហ៊ុននេះ នឹងនាំចេញប្រេងឆៅ ទៅទីផ្សារអន្តរជាតិ ខណ:ដែលពេលនេះ ក្រុមហ៊ុនកំពុងរៀបចំសំណុំបែបបទ ដើម្បីសុំគោលការណ៍នៃការនាំចេញ៕
មតិយោបល់