កាលពីថ្ងៃច័ន្ទ ស្ថានទូតចិនប្រចាំនៅចក្រភពអង់គ្លេសបានធ្វើការរិះគន់យ៉ាងខ្លាំង បន្ទាប់ពីសេចក្តីថ្លែងការណ៍នៃកិច្ចប្រជុំ G7 បានជជែកអំពីទីក្រុងហុងកុង ខេត្តស៊ីនជាំង និងកោះតៃវ៉ាន់ និងបានអំពាវនាវឱ្យរដ្ឋជាសមាជិកទាំងអស់បញ្ឈប់ការជ្រៀតជ្រែកចូលក្នុងកិច្ចការផ្ទៃក្នុងរបស់ចិន។ អ្នកការទូតចិនបានសង្កត់ធ្ងន់ថា ការផ្តោតសំខាន់របស់ក្រុមប្រទេស G7 ទៅលើបញ្ហាខេត្តស៊ីនជាំង គឺជាឧបាយកលនយោបាយសុទ្ធសាធ ដោយលោកបានកត់សម្គាល់ថា ប្រទេសចិនមិនអាចត្រូវបាននិយាយបង្កាច់បង្ខូច ហើយដល់ផលប្រយោជន៍របស់ប្រទេសចិនមិនអាចត្រូវបានរំលោភបំពានឡើយ។
ជាមួយគ្នានេះដែរ ស្ថានទូតនេះបានយោងទៅលើការលើកឡើងរបស់កិច្ចប្រជុំក្រុមប្រទេស G7 អំពីប្រភពដើមនៃមេរោគកូរ៉ូណាវីរុស ដោយបានសង្កត់ធ្ងន់ថា ការស៊ើបអង្កេតណាមួយទៅលើបញ្ហានេះគួរតែត្រូវបានធ្វើឡើងដោយក្រុមអ្នកវិទ្យាសាស្ត្រអន្តរជាតិ ហើយមិនគួរធ្វើនយោបាយទៅលើបញ្ហានេះឡើយ។
យោងតាមរបាយការណ៍បានឱ្យដឹងថា កិច្ចប្រជុំកំពូលកាលពីពេលថ្មីៗនេះនៅសណ្ឋាគារ Carbis Bay នៅទីក្រុង Cornwall ដោយមានការចូលរួមពីបណ្តាមេដឹកនាំនៃក្រុមប្រទេស G7 (ដែលរួមមានសហរដ្ឋអាមេរិក អង់គ្លេស បារាំង អាល្លឺម៉ង់ អ៊ីតាលី កាណាដា និងជប៉ុន) ដែលត្រូវបានកោះប្រជុំជាលើកដំបូងចាប់តាំងពីមានការរាលដាលនៃជំងឺរាតត្បាតមក។ ទំនាក់ទំនងជាមួយប្រទេសចិន គឺជាបញ្ហាចម្បងមួយនៅក្នុងរបៀបវារ:នៃកិច្ចប្រជុំនេះ។
ប្រទេសចិនបានរិះគន់ម្តងហើយម្តងទៀតនូវការចោទប្រកាន់អំពីការរំលោភសិទ្ធិមនុស្សប្រឆាំងនឹងប្រជាជនម៉ូស្លីម Uyghur ដោយបានចាត់ទុកជំរំអប់រំឡើងវិញនៅខេត្តស៊ីនជាំងជាមជ្ឈមណ្ឌលបណ្តុះបណ្តាលដែលត្រូវបានបង្កើតឡើងដើម្បីប្រយុទ្ធប្រឆាំងនឹងភាពជ្រុលនិយមនៅក្នុងតំបន់។ ទីក្រុងប៉េកាំងក៏បានសង្កត់ធ្ងន់ផងដែរថា គោលនយោបាយរបស់ខ្លួនចំពោះកោះតៃវ៉ាន់ គឺជាការកំណត់ការបង្រួបបង្រួមដោយសន្តិភាព៕
មតិយោបល់