បន្ទាប់ពីការរៀបអាពាហ៍ពិពាហ៍ គឺការចាប់ផ្តើមជីវិតគូ ហើយមានរឿងមួយដែលគូស្វាមីភរិយាទាំងឡាយមិនអាចចៀសរួចនោះគឺរឿង “លុយកាក់” ព្រោះជីវិតគូភាគច្រើនតែងចាប់ផ្តើមរៀបចំផែនការសំរាប់អនាគតរួមគ្នា ដែលមានទាំងការត្រៀមសម្លឹងរក​មើល​​ផ្ទះដើម្បីស្នាក់អាស្រ័យ រថយន្ត និងមានទាយាទសំរាប់ស្នងត្រកូលជាដើម ដូច្នេះការរៀបចំផែនការចាត់ការប្រាក់ចំណូល​ចំណាយ​​ គឺជារឿងសំខាន់ដែលត្រូវតែមានការសំរេចចិត្តរួមគ្នា ដែលបើសឹនជាទាំងពីរនាក់មានគោលការណ៍ក្នុងការចាត់ការរឿងនេះ​បាន​​ល្អនោះ នឹងធ្វើឲ្យរឿងលុយកាក់ក្នុងគ្រួសារងាយស្រួលឡើងមិនខាន ។

១.​​ ពិចារណាពីស្ថានភាពលុយកាក់ក្នុងពេលបច្ចុប្បន្ន

ធ្វើកំណត់ត្រាប្រាក់ចំណូល និងការចាយវាយក្នុងគ្រួសារ ទាំងប្រាក់ខែ និងប្រាក់ចំណូលផ្សេងទៀត ហើយតាមដោយការចាយវាយ ទាំងថ្លៃឈ្នួលផ្ទះ ថ្លៃធ្វើតំណើរ ថ្លៃម្ហូបអាហារ ថ្លៃគ្រឿងឧបភោគបរិភោគផ្សេងៗ និងថ្លៃចាយវាយផ្ទាល់ខ្លួនជាដើម ។

ប្រយោជន៍នៃការធ្វើកំណត់ត្រានឹងធ្វើឲ្យទាំងពីរនាក់បានដឹងពីប្រាក់ចំណូល និងប្រាក់ចំណាយទាំងអស់រួមគ្នា ដើម្បីឲ្យកើតមានការរៀបផែនការតទៅទៀតថា តើនឹងត្រូវទទួលខុសត្រូវរួមគ្នាបែបណា?

២ . កសាងអនាគតរួមគ្នា

ការកសាងគោលដៅនៅថ្ងៃខាងមុខរួមគ្នា នឹងធ្វើឲ្យទាំងពីរនាក់មានភាពក្លៀវក្លាស្វាហាប់ក្នុងការដើរទៅឲ្យដល់គោលដៅ​នោះ​​យ៉ាង​​តាំងចិត្ត ដូចជា ការទិញផ្ទះ ទិញឡាន ការទៅដើរលេងកំសាន្ត ការមានកូន និងការសឹក្សារបស់កូនជាដើម ។ ក្រៅពីនេះ នៅ

ត្រូវកំណត់រយ:ពេលទៀតផងថា តើគោលដៅដែលយើងចង់បាននោះនឹងកើតឡើងនៅពេលណា? នៅពេលមានគោលដៅ និងរយ:ពេលដែលច្បាស់លាស់ហើយនោះ សឹមពិចារណាក្នុងការចាត់លំដាប់ថ្នាក់ផែនការលុយកាក់ជាក្រោយ ។

 ៣ . រៀបផែនការចាយវាយ និងសន្សំសំចៃរួមគ្នា

ពេលក្លាយជាគូជីវិតនឹងគ្នាហើយ ច្បាស់ជាស្គាល់ចិត្ត ស្គាល់និស្ស័យគ្នាច្បាស់មិនខាន អ្នកណាចូលចិត្តទិញ អ្នកណាចូល​ចិត្ត​សន្សំ ចេះទុកចេះចាយ តែភាគច្រើនខាងស្រីតែងមានភាពល្អឹតល្អន់ និងប្រយ័ត្នប្រយែងជាងខាងប្រុស ទើបមិនមែនជារឿងផ្លែក​ឡើយ ដែលស្វាមីភរិយាជាច្រើនគូច្រើនលើកឲ្យខាងភរិយាជាអ្នកមើលការខុសត្រូវរឿងលុយកាក់នោះ ។ តែ នឹងបានទៅដល់គោល​ដៅដូចផែនការដែលបានរៀបចំរួមគ្នា ឬក៏អត់នោះ វាអាស្រ័យលើផែនការចាយវាយរបស់អ្នកទាំងពីរហ្នឹងឯង ។

ការពិតទៅ ការណែនាំខាងលើនេះអាចមិនមែនជាវិធីដែលល្អឥតខ្ចោះបំផុតសំរាប់គ្រប់គូស្វាមីភរិយាទាំងអស់នោះទេ ព្រោះមួយគូៗតែងមានទង្វើខាងហិរញ្ញវត្ថុខុសផ្លែកពីគ្នា តែគោលការណ៍ទាំងអស់នេះ គឺជាវិធីសាស្រ្តតំបូងសំរាប់នាំយកទៅពិចារណាកែច្នៃប្រើប៉ុណ្ណោះ ព្រោះអ្វីដែលសំខាន់បំផុតនោះគឺ ការរិះរកវិធីដែលសក្តិសមបំផុតសំរាប់គូស្វាមីភរិយារបស់ខ្លួនឯងទៅវិញទេ ។