សេចក្តីសម្រេចដែលក្រុមប្រឹក្សាសិទ្ធិមនុស្សបានអនុម័តដោយគ្មានការបោះឆ្នោតជាសំណើរបស់ប្រទេសប៉ាគីស្ថានដែលតំណាងឲ្យក្រុមប្រទេសសមាជិកនៃអង្គការនៃកិច្ចសហប្រតិបត្តិការអ៊ីស្លាម។ លោកខាលីល ហាស្ម៊ី អ្នកតំណាងប៉ាគីស្ថានបានថ្លែងនៅពេលបង្ហាញសំណើថា ស្ថានភាពមនុស្សធម៌ និងសិទ្ធិមនុស្សរបស់ពួករ៉ូហ៊ីងយ៉ាអ្នកកាន់សាសនាអ៊ីស្លាមនៅតែមានសភាពធ្ងន់ធ្ងរ ដុនដាប និងតម្រូវឲ្យមានការអំពាវនាវរួមពីក្រុមប្រឹក្សាសិទ្ធិមនុស្សដោយស្នើឱ្យភូមាបញ្ឈប់ការរំលោភសិទ្ធិមនុស្សជាបន្ទាន់។
ទន្ទឹមនឹងផ្តោតសំខាន់លើស្ថានភាពសិទ្ធិមនុស្សរបស់ពួករ៉ូហ៊ីងយ៉ា និងជនជាតិភាគតិចផ្សេងទៀតនៅភូមា សេចក្តីសម្រេចដែលជាសំណើរបស់ប៉ាគីស្ថានដដែលមួយនេះក៏បានស្នើឲ្យមានការបើកឡើងនូវនីតិវិធីនៃការផ្សះផ្សាផ្ទៃក្នុងប្រកបដោយការស្ថាបនា និងសន្តិវិធីដែលអនុលោមតាមឆន្ទៈ និងផលប្រយោជន៍របស់ប្រជាជនភូមា រួមទាំងប្រជាជនរ៉ូហ៊ីងយ៉ា និងជនជាតិភាគតិចផ្សេងទៀតនៅភូមា។ បន្ទាប់មក សេចក្តីសម្រេចរបស់ក្រុមប្រឹក្សាសិទ្ធិមនុស្សមិនភ្លេចសម្តែងពីការគាំទ្រឥតងាករេចំពោះពលរដ្ឋ និងសេចក្តីប្រាថ្នាប្រជាធិបតេយ្យរបស់ពួកគេ។
ចុងក្រោយ សេចក្តីសម្រេចបានសម្តែងក្តីបារម្ភចំពោះកំណើនអំពើហិង្សា កំណើននៃការរំលោភសិទ្ធិមនុស្សដែលពួករ៉ូហ៊ីងយ៉ាជាជនរងគ្រោះ និងកំណើននៃការបម្លាស់ទីរបស់ជនស៊ីវិលដោយបង្ខំ មានទាំងពួករ៉ូហ៊ីងយ៉ា និងជនជាតិភាគតិចផ្សេងទៀត។ នៅក្នុងន័យនេះ សេចក្តីសម្រេចរបស់ក្រុមប្រឹក្សាសិទ្ធិមនុស្សបានអំពាវនាវឲ្យបិទបញ្ចប់ជាបន្ទាន់នូវការប្រយុទ្ធគ្នា អរិភាព និងការវាយប្រហារលើជនស៊ីវិលដើម្បីអនុញ្ញាតឲ្យជនភៀសខ្លួន និងជនបម្លាស់ទីដែលចង់វិលត្រឡប់ដោយស្ម័គចិត្តអាចវិលត្រឡប់ប្រកបដោយសុវត្ថិភាព ថ្លៃថ្នូរ និងយូរអង្វែង៕
មតិយោបល់