រ៉ង់ហ្គូន ដែលមានប្រជាជនរស់នៅជាង៧លាននាក់ និងក្រុងធំទីពីររបស់ភូមា ត្រូវបានបិទខ្ទប់តាំងពីជាច្រើនថ្ងៃមកហើយដើម្បីទប់ស្កាត់ការចម្លងរាតត្បាតនៃជំងឺកូវី១៩។ ប៉ុន្តែចំនួនអ្នកឆ្លងថ្មី និងអ្នកស្លាប់ នៅតែកើនឡើងជាលំដាប់ និងយ៉ាងខ្លាំងដដែល។ ជាង៧០០០ករណីឆ្លងថ្មីក្នុងថ្ងៃពុធទី ១៤កក្កដា ២០២១ ទល់នឹងក្រោម៥០នាក់ក្នុងមួយថ្ងៃកាលពីដើមខែឧសភា។
ប្រឈមនឹងសន្ទុះកំណើនអ្នកវិជ្ជមាន មន្ទីរពេទ្យខ្វះសព្វខ្វះគ្រប់ ជាពិសេសគឺខ្វះខ្យល់អុកស៊ីហ្សែនសម្រាប់ជំនួយដង្ហើមអ្នកជំងឺកូវីដ១៩តែម្តង។ សាច់ញាតិអ្នកជំងឺត្រូវតម្រង់ជួរយ៉ាងវែង រាប់រយនាក់ ចាំបំពេញទុកបំពង់អុកស៊ីហ្សែន តាមមណ្ឌលចែកចាយអុកស៊ីហ្សែន ឬស្ថានីយ៍ផ្សេងៗ ខ្លះបានដោយឥតគិតថ្លៃ ខ្លះត្រូវទិញ។
កាលពីថ្ងៃអង្គារទី ១៣កក្កដា ប្រមុខដឹកនាំយោធាភូមា បានអះអាងថាប្រទេសមានអុកស៊ីហ្សែនគ្រប់គ្រាន់ ពុំមានគ្រោះអាសន្នអ្វីគួរឱ្យបារម្ភទេ។ ប៉ុន្តែនៅថ្ងៃពុធ សារព័ត៌មានផ្លូវការ Global New Light of Myanmar បានទទួលស្គាល់ថាភូមា កំពុងចាប់ជួបការលំបាក។
កំណើនអ្នកឆ្លងថ្មីបានស្ទុះឡើងខ្លាំង ក្នុងខណ:ដែលប្រទេសកំពុងអង្រួនដោយអំពើហិង្សា និងកូដកម្មរយ:ពេលវែងរបស់ក្រុមគ្រូពេទ្យនិងបុគ្គលិកសុខាភិបាល ប្រឆាំងនឹងមេដឹកនាំយោធា។ ចំណែកយុទ្ធនាការចាក់ថ្នាំបង្ការកូវីដ១៩ ប្រព្រឹត្តទៅយ៉ាងយឺតបំផុត។ ក្នុងចំណោមប្រជាពលរដ្ឋសរុបជាង៥៤លាននាក់ មានតែប្រមាណ២លាននាក់ប៉ុណ្ណោះបានទទួលវ៉ាក់សាំងរួច។ ភូមាត្រូវទទួលវ៉ាក់សាំងពីចិនចំនួន៦លានដូសបន្ថែមទៀតនៅខែក្រោយ ពោលគឺយឺតពេលបន្តិចទៅហើយសម្រាប់អ្នកជំងឺកំពុងដង្ហក់រកខ្យល់។
មេដឹកនាំយោធាគ្មានធនធាន គ្មានសមត្ថភាពនិងភាពស្របច្បាប់ចាំបាច់ក្នុងការគ្រប់គ្រងវិបត្តិនេះទេ។ វិបត្តិកូវីដ១៩ នឹងសម្លាប់ជីវិតមនុស្សច្រើនជាពិសេសនៅភូមា ដោយហេតុតែភាពមិនទុកចិត្តលើមេដឹកនាំសឹក។ នេះបើតាមលោក Tom Andrews អ្នករាយការណ៍ពិសេសរបស់អង្គការសហប្រជាជាតិទទួលបន្ទុកកិច្ចការភូមា៕
មតិយោបល់