លោក Zhong Nanshan អ្នកជំនាញរោគរាតត្បាតកំពូលរបស់ប្រទេសចិនបាននិយាយថា ប្រទេសចិន​ត្រូវការ​ចាក់វ៉ាក់សាំងប្រមាណ ៨៣ភាគរយនៃប្រជាជនសរុបរបស់ខ្លួនដើម្បីទទួលបានភាពស៊ាំ។ លោកក៏បានបង្ហាញផងដែរថា ករណីធ្ងន់ធ្ងរទាំង ១៣នាក់ដែលឆ្លងវីរុសទម្រង់ឌែលតានៅទីក្រុង​ក្វាងចូវ​នៅក្នុងការផ្ទុះការរាលដាលជំងឺកូវីដ-១៩កាលពីខែឧសភានោះមិនបានទទួលការចាក់វ៉ាក់សាំងទេ។

យោងតាមសារព័ត៌មាន Qianjiang Evening បានរាយការណ៍ថា លោក Zhong បានធ្វើការកត់សម្គាល់ខាង​លើនេះនៅក្នុងសុន្ទរកថាមួយនៅទីក្រុងក្វាងចូវនៃខេត្តក្វាងទុងនៅភាគខាងត្បូងប្រទេសចិនកាលពីថ្ងៃសៅរ៍។ ស្របពេលដែលមានការផ្ទុះឡើងនៃជំងឺកូវីដ-១៩ នៅក្នុងទីក្រុងជាច្រើននៅទូទាំងប្រទេសចិន​នោះ លោក Zhong បាននិយាយថា ប្រទេសចិនបានគ្រប់គ្រងវ៉ាក់សាំងច្រើនជាងគេបំផុត​នៅលើពិភព​លោក។

លោក Zhong បាននិយាយថា ដើម្បីសម្រេចបាននូវភាពស៊ាំតាមរយ:ការចាក់វ៉ាក់សាំង ប្រទេសចិនត្រូវ​ការ​ការចាក់វ៉ាក់សាំងឱ្យដល់ប្រជាជនឱ្យបាន ៨៣,៣ភាគរយនៃប្រជាជនសរុបរបស់ខ្លួន។

យោងតាមសារព័ត៌មាន Qianjiang Evening News បានឱ្យដឹងថា លោក Zhong បាននិយាយបន្ថែមថា វ៉ាក់សាំងការពារជំងឺកូវីដ-១៩ របស់ចិន អាចការពារមនុស្សប្រឆាំងនឹងវីរុសទម្រង់ឌែលតា ដោយយោងទៅលើការសិក្សាទៅលើអ្នកជំងឺកូវីដ-១៩ ប្រហែល ១០០នាក់ដែលបានឆ្លងវីរុសនេះ​នៅទីក្រុងក្វាងចូវកាលពីខែឧសភា។ ការស្រាវជ្រាវបឋមមួយចំនួនបានរកឃើញថា វ៉ាក់សាំងរបស់​ចិនមានការការពារបាន ១០០ភាគរយប្រឆាំងនឹងករណីធ្ងន់ធ្ងរ ការពារបាន ៧៦,៩ភាគរយប្រឆាំង​នឹងករណីមធ្យម ការពារបាន ៦៧,២ភាគរយប្រឆាំងនឹងករណីស្រាល និងការពារបាន ៦៣,២ភាគ​រយ​ប្រឆាំងនឹងករណីចេញរោគសញ្ញា។

លោកបានរំលឹកដល់សាធារណជនថា ករណីធ្ងន់ធ្ងរទាំង ១៣ នៅទីក្រុងក្វាងចូវកាលពីក្នុងខែឧសភា​ដែល​រងផលប៉ះពាល់ជាមួយនឹងវីរុសទម្រង់ឌែលតា គឺពួកគេមិនបានទទួលការចាក់វ៉ាក់សាំងទេ៕