(កាប៊ុល)៖ ក្រុមសកម្មប្រយុទ្ធតាលីបង់អាចនឹងឡោមព័ទ្ធរដ្ឋធានីកាប៊ុល ក្នុងរយៈពេល៣០ថ្ងៃ ហើយអាច វាយយករដ្ឋធានីមួយនេះតែម្ដងក្នុងពេល៩០ថ្ងៃ ខណៈក្រុមសកម្មប្រយុទ្ធមួយនេះនៅតែបន្តវាយលុករុលទៅមុខក្នុងសមរភូមិនៅទូទាំងប្រទេស។ នេះបើតាមមន្ត្រីម្នាក់មកពីក្រសួងការពារជាតិអាមេរិក។

មន្ត្រីអាមេរិកខាងលើដដែលធ្វើការអះអាងបែបនេះប្រាប់ទីភ្នាក់ងារព័ត៌មាន Reuters នៅថ្ងៃពុធសប្ដាហ៍នេះក្នុងលក្ខខណ្ឌមិនបញ្ចេញឈ្មោះ និងផ្អែកលើប្រភពបាន មកពីទីភ្នាក់ងារស៊ើប ការសម្ងាត់អាមេរិកដែលបានវាយតម្លៃជាថ្មីថាតើកងកម្លាំងរដ្ឋាភិបាលអាហ្វហ្កានីស្ថានអាចប្រឈមមុខ និងការពារទីក្រុងកាប៊ុលពីការវាយលុកពី សំណាក់ក្រុមតាលីបង់បានយូរប៉ុណ្ណា ក្រោយកងទ័ពអាមេរិកនឹងត្រូវដកចេញទាំងអស់ពីអាហ្វហ្កានីស្ថានតាមបញ្ជារបស់លោកប្រធានាធិបតី ចូ បៃដិនឱ្យបានមុន ថ្ងៃទី៣១ ខែសីហានេះ។

មកទល់បច្ចុប្បន្ន ក្រុមតាលីបង់កំពុងគ្រប់គ្រងទឹកដីអាហ្វហ្កានីស្ថាន ៦៥ភាគរយ ហើយទើបតែបានវាយដណ្ដើមយកបានទីក្រុងចំនួន៨បន្ថែម ក្នុងនោះ រួមមានទាំងការវាយយកទីក្រុង Faizabad នៃខេត្ត Badakhshan ស្ថិតនៅភាគឦសាននៃប្រទេសកាលពីថ្ងៃពុធម្សិលមិញ។

ប្រភព៖​ Reuters