បើតាមទីភ្នាក់ងារព័ត៌មានបារាំង AFP នាវាឈ្មោះ MT Strovolos ដែលមានដោតទង់ជាតិបាហាម៉ា បានធ្វើដំណើរចេញពីឆ្នេសមុទ្រស៊ូម៉ាត្រាកាលពីថ្ងៃទី២៧កក្កដា ពោលគឺតែបុន្មានថ្ងៃប៉ុណ្ណោះបន្ទាប់ពីរដ្ឋាភិបាលទីក្រុងភ្នំពេញ បានចេញសេចក្ដីប្រកាសពណ៌ក្រហមមួយទៅកាន់ប៉ូលិសព្រហ្មទណ្ឌអន្តរជាតិ អាំងទែប៉ូល ដើម្បីសុំការសហការក្នុងការរឹបអូសនាវា ដែលបានលួចដឹកប្រេងឆៅចេញពីកម្ពុជានោះ។ បន្ទាប់ពីឃាត់កប៉ាល់នេះរួច អាជ្ញាធរឥណ្ឌូនេស៊ីបានបើកការសួរចម្លើយលើនាវិកនៅលើនាវា ដែលមានជនជាតិឥណ្ឌាចំនួន១៣នាក់ ជនជាតិបង់ក្លាដែសចំនួន៣នាក់ និងជនជាតិមីយ៉ាន់ម៉ាចំនួន៣នាក់។ ការសួរចម្លើយនេះប្រព្រឹត្តទៅនៅមូលដ្ឋានជើងទឹករបស់ឥណ្ឌូនេស៊ី ក្បែរប្រទេសសិង្ហបុរី។
គួរជម្រាបថា នាវាដែលមានផ្ទុកប្រេងលួចពីកម្ពុជានោះ មានប្រវែង ១៨៣ម៉ែត្រ និងមានទិសដៅធ្វើដំណើរចេញពីប្រទេសថៃទៅកាន់កោះ បាថាម នៃប្រទេសឥណ្ឌូនេស៊ី។ នាវានេះបានបិទប្រព័ន្ធកំណត់អត្តសញ្ញាណរបស់ខ្លួន ព្រមទាំងបានបោះយុថ្កាដោយខុសច្បាប់នៅលើដែនទឹកនៃប្រជុំកោះឥណ្ឌូនេស៊ី។
អាជ្ញាធរឥណ្ឌូនេស៊ីបានបញ្ជាក់ថា ប្រធានក្រុមនាវិកដែលមានសញ្ជាតិបង់ក្លាដេស អាចប្រឈមនឹងការជាប់ពន្ធនាគារចំនួន១ឆ្នាំ និងពិន័យជាទឹកប្រាក់ចំនួន ១ម៉ឺន៤ពាន់ដុល្លាសហរដ្ឋអាមេរិក ប្រសិនបើពួកគេត្រូវបានរកឃើញថាមានជាប់ពាក់ព័ន្ធនឹងបទរំលោភដែនសមុទ្រ។ និងថា «កងទ័ពជើងទឹកឥណ្ឌូនេស៊ី នឹងមិនមានភាពស្ទាក់ស្ទើរក្នុងការចាត់វិធានការប្រឆាំងនឹងឧក្រិដ្ឋកម្មណាមួយ ដែលបានប្រព្រឹត្តិនៅក្នុងដែនសមត្ថកិច្ចរបស់ខ្លួននោះឡើយ»។
ទាក់ទិននឹងបញ្ហានេះ លោកជៀប សួរ អគ្គនាយកនៃអគ្គនាយកដ្ឋានប្រេងកាត ក្រសួងធនធានរ៉ែ និងថាមពលកម្ពុជាបានថ្លែងថា៖ «ក្រុមហ៊ុនបានរាយការណ៍មករដ្ឋាភិបាលយើងថា ក្រុមនាវិកបានលួចយកប្រេងឆៅដែលមានចំនួន ២៩ម៉ឺនបារែលចេញពីកម្ពុជា ប៉ុន្តែត្រូវបាននាវាដឹកប្រេងឆ្លើយតបថាដោយសារក្រុមហ៊ុនជំពាក់លុយពួកគេ។» លោកបន្ថែមទៀតថា កម្ពុជានិងឥណ្ឌូនេស៊ីកំពុងសហការគ្នាដើម្បីបញ្ជូនប្រេងលើនាវានោះមកឲ្យកម្ពុជាវិញ។
គួរបញ្ជាក់ថាប្រេងឆៅរបស់កម្ពុជាចំនួន២៩ម៉ឺនបារ៉ែល ដែលក្រុមហ៊ុន KrisEnergy បូមបានពីតំបន់អណ្ដូងអប្សរាឬប្លុកA ត្រូវបានអ្នកបើកបរកប៉ាល់ផ្ទុកប្រេងនោះ លួចដឹកចូលក្នុងទឹកដីប្រទេសថៃកាលពីខែមិថុនា។ អគ្គនាយកប្រេងកាតនៃក្រសួងរ៉ែ និងថាមពល បានបញ្ជាក់ថា អ្នកដែលបញ្ជាឱ្យកប៉ាល់ដឹកប្រេងរបស់កម្ពុជារត់នោះ គឺជាម្ចាស់បំណុលរបស់ក្រុមហ៊ុន KrisEnergy៕
មតិយោបល់