នៅអាហ្វហ្កានីស្ថាន កាលពីយប់ថ្ងៃអាទិត្យ ឈានចូលថ្ងៃចន្ទម្សិលមិញ​ ក្រុមតាលីបង់ បានបើកការវាយ​ប្រយុទ្ធ ដើម្បី​ដណ្តើ​ម​យក​តំបន់ប៉ានស្ហៀរ ដែលជាតំបន់តស៊ូចុងក្រោយ​គេបង្អស់​។ ផ្អែកតាមប្រភពពីអ្នកនាំពាក្យ​ម្នាក់ របស់​ក្រុមចលនាតស៊ូតំបន់ប៉ានស្ហៀរនេះ បានឲ្យដឹងថាការវាយប្រយុទ្ធយប់ថ្ងៃអាទិត្យ​ គឺក្រុមតាលីបង់មានស្លាប់​៨នាក់ និងរបួសច្រើននាក់ទៀត ចំណែកខាងក្រុមចលនាតស៊ូ មានស្លាប់២នាក់។

ដោយឡែក យោងតាមទីភ្នាក់ងារព័ត៌មាន Reuters គឺ លោក Ahmad Massoud ដែលជាមេចលនាតស៊ូតំបន់ប៉ានស្ហៀរ បានប្រកាសថា សុខចិត្តចរចាជាមួយក្រុមតាលីបង់ ដើម្បីបិទបញ្ចប់ការប្រយុទ្ធ។ ក៏ប៉ុន្តែ លោក Wali Massoud ដែលត្រូវជាឪពុកមា របស់លោក Ahmad Massoud បានអះអាងថា វាមិនមែនមានន័យថា ចលនាតស៊ូខេត្តប៉ានស្ហៀរ បានទំលាក់អាវុធនោះទេ។