បរទេស៖ កីឡាករ Georginio Wijnaldum នៅសប្តាហ៍នេះបានធ្វើការសារភាពយ៉ាងគួរឲ្យភ្ញាក់ផ្អើលមួយថាគាត់មិនសូវជាសប្បាយចិត្តខ្លាំងនោះទេពេលកំពុងមានវត្តមានលេងជាមួយនឹង PSG ហើយជីវិតរស់នៅប្រទេសបារាំងគឺពិតជាលំបាក។

PSG បានចុះកុងត្រាទិញយក Wijnaldum ពីក្លឹបហង្សក្រហម Liverpool ដោយមិនមានតម្លៃខ្លួនឡើយកាលពីរដូវក្តៅកន្លងមកនេះបន្ទាប់ពីកីឡាករហូឡង់រូបនេះបានបង្ហាញស្នាដៃក្នុងនាមជាកីឡាករសំខាន់ម្នាក់ដែលជួយឲ្យក្លឹបអង់គ្លេសរូបនេះលើកពាន Champions League ផង Premier League ផងក្នុងរយៈ២រដូវកាលចុងក្រោយ។

កីឡាករបាននិយាយថា៖ខ្ញុំមិនអាចនិយាយថាពេលនេះខ្ញុំសប្បាយចិត្ត១០០ភាគរយនោះទេ។ស្ថានភាពមិនល្អដូចការរំពឹងទុកប៉ុន្តែខ្ញុំនឹងបន្តគិតវិជ្ជមានពីព្រោះថាវាគឺជាបាល់ទាត់ហើយខ្ញុំត្រូវតែបន្តរៀនសូត្រពីវាបន្ថែមទៀត៕