ប្រជាពលរដ្ឋរស់នៅសងខាងផ្លូវទាំង៣៨ខ្សែ ក្នុងក្រុងសៀមរាបទទួលបានការតភ្ជាប់បណ្តាញលូទឹកភ្លៀង និងលូទឹកកខ្វក់ ដោយមិនចាំបាច់ចំណាយថវិកាផ្ទាល់ខ្លួនឡើយ ព្រោះការចំណាយទាំងអស់ជាបន្ទុករបស់រដ្ឋ ដើម្បីធ្វើយ៉ាងណាលើកកម្ពស់អនាម័យ បរិស្ថានទីក្រុងឱកាន់តែស្រស់ស្អាត។

សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានគណៈកម្មការអន្តរក្រសួង ដើម្បីសិក្សានិង អនុវត្តគម្រោងស្ថាបនាហេដ្ឋារចនាសម្ព័ន្ធផ្លូវ៣៨ខ្សែ នៅក្នុងក្រុងសៀមរាប ខេត្តសៀមរាប មានប្រសាសន៍ក្នុងកិច្ចសម្ភាសន៍ជាមួយ អ្នកសារព័ត៌មានថា ក្រៅពីសមិទ្ធផលផ្លូវថ្នល់ទាំង៣៨ខ្សែ ដែលរាជរដ្ឋាភិបាលស្ថាបនាឡើង ដើម្បីសម្រួលការលំបាករបស់បងប្អូន ប្រជាពលរដ្ឋហើយនោះ សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីបានសម្រេចតភ្ជាប់បណ្តាញលូទឹកភ្លៀង និងទឹកកខ្វក់ ដោយមិនគិតថ្លៃ ចំពោះអ្នករស់នៅសងខាងផ្លូវទាំង៣៨ខ្សែនេះ ដែលមានចំនួនសរុបប្រមាណជាង១២០០០ គ្រួសារ។

សម្តេចបន្តថា នេះជាចំណងដៃដ៏វិសេសថ្លៃថ្លាមួយ សម្រាប់បងប្អូនប្រជាពលរដ្ឋរស់នៅក្នុងក្រុងសៀមរាប ដោយទទួលបានការយកចិត្ត ទុកដាក់ពីរាជរដ្ឋាភិបាល ធ្វើការកែលម្អនូវសោភ័ណភាពទីក្រុងប្រវត្តិសាស្ត្រមួយនេះ ឱ្យក្លាយជាទីក្រុងដ៏ទំនើប ពោរពេញដោយ សោភ័ណភាព បរិស្ថានល្អសម្រាប់ការរស់នៅឱ្យសក្ដិសមជាទីក្រុងទេសចរណ៍ វប្បធម៌ និងប្រវត្តិសាស្ត្រ ជាពិសេសសម្រាប់ទទួល ភ្ញៀវទេសចរ មកកម្សាន្តនៅពេលឆាប់ៗខាងមុខនេះ។

ការលំបាកត្រង់ថាកន្លែងខ្លះមានលទ្ធភាព កន្លែងខ្លះអត់លទ្ធភាពទេ ដូច្នេះជាចុងបំផុតគណៈកម្មការអន្តរក្រសួងនេះ បានឯកភាព គ្នា សុំគោលការណ៍ពីសម្តេចអគ្គមហាសេនាបតីតេជោ ដើម្បីសុំថវិកាបន្ថែម ដើម្បីបន្តលូទឹកភ្លៀង លូទឹកស្អុយជូនដល់អ្នកដែលនៅសង ខាងផ្លូវ៣៨ខ្សែទាំងអស់ដោយមិនបាច់ឱ្យបង់លុយទេ ដោយថវិកាហ្នឹងសម្តេចតេជោលោកចងដៃ ជូនថែម ចំពោះបញ្ហានេះវាជាជោគជ័យ មួយដ៏ធំណាស់ អរគុណខ្លាំងណាស់ ចំពោះសម្តេចតេជោនាយករដ្ឋមន្ត្រី ដែលលោកបានយកចិត្តទុកដាក់ ជាកាដូមួយសម្រាប់អ្នក ក្រុងសៀមរាប ដែលមានផ្លូវ៣៨ខ្សែឆ្លងកាត់នេះ ជាជោគជ័យមួយដ៏សំខាន់ណាស់។

សូមជម្រាបផងដែរថា គម្រោងស្ថាបនាហេដ្ឋារចនាសម្ព័ន្ធផ្លូវចំនួន ៣៨ខ្សែ នៅក្នុងក្រុងសៀមរាប មានប្រវែងសរុបជាង ១០៨គីឡូម៉ែត្រ។ គិតត្រឹមថ្ងៃទី១៤ ខែវិច្ឆិកា ឆ្នាំ២០២១ លទ្ធផលនៃដំណើរការជួសជុលសម្រេចបាន ប្រមាណ៩០ភាគរយហើយ ដោយគ្រោងនឹងបញ្ចប់ ការសាងសង់ជាស្ថាពរនៅចុងខែធ្នូ ឆ្នាំ២០២១ខាងមុខនេះ៕