នៅព្រឹកថ្ងៃទី២៤ ខែធ្នូ ឆ្នាំ២០២១នេះ គណបក្សប្រជាជនកម្ពុជា បានបើកសន្និបាតគណៈកម្មាធិការកណ្តាល លើកទី៤៣ អាណត្តិទី៥ របស់ខ្លួន ដើម្បីសម្រេចលើបេក្ខភាពនាយករដ្ឋមន្រ្តីរបស់បក្សនេះ សម្រាប់ថ្ងៃអនាគត រួមទាំងមានរបៀបវារៈមួយចំនួនទៀត។
សន្និបាតគណៈកម្មាធិការកណ្តាល លើកទី៤៣ ត្រូវបានធ្វើឡើងក្រោមអធិបតីភាព សម្តេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា និងសម្តេចអគ្គមហាពញាចក្រី ហេង សំរិន ប្រធានកិត្តិយសគណបក្សប្រជាជនកម្ពុជា ដោយមានការចូលរួមពីសមាជិកអចិន្រ្តៃយ៍ សមាជិកគណៈកម្មាធិការកណ្តាល រួមទាំងតំណាងថ្នាក់ដឹកនាំនៅមូលដ្ឋានរាជធានីខេត្តផងដែរ។
តាមប្រភពព័ត៌មានពីទីភ្នាក់ងារសារព័ត៌មានជាតិកម្ពុជា (AKP) បានឲ្យដឹងថា គណៈកម្មាធិការកណ្តាលគណបក្សប្រជាជនកម្ពុជា បានជ្រើសតាំងជាបេក្ខភាព ឯកឧត្តម ហ៊ុន ម៉ាណែត សមាជិកគណៈអចិន្រ្តៃយ៍ និងជាប្រធានយុវជនគណបក្សប្រជាជនកម្ពុជាថ្នាក់កណ្តាល ជានាយករដ្ឋមន្ត្រី នាពេលអនាគត។
ដោយឡែកសម្តេចពិជ័យសេនា ទៀ បាញ់ និងលោកជំទាវកិត្តិសង្គហបណ្ឌិត ម៉ែន សំអន ដែលសម្តេច និងលោកជំទាវ ជាសមាជិកគណៈអចិន្រ្តៃយ៍ នៃគណបក្សប្រជាជនកម្ពុជា ផងដែរនោះ ត្រូវបានសន្និបាតគណៈកម្មាធិការកណ្តាលគណបក្ស បោះឆ្នោតជ្រើសតាំងជា អនុប្រធានគណបក្សប្រជាជនកម្ពុជា នៅថ្ងៃនេះ៕
ប្រភព៖ AKP
![](https://i0.wp.com/domneng.news/wp-content/uploads/2021/12/photo-2021-12-24-11-11-10.jpg?resize=1000%2C666&ssl=1)
![](https://i0.wp.com/domneng.news/wp-content/uploads/2021/12/១-131.jpg?resize=880%2C750&ssl=1)
![](https://i0.wp.com/domneng.news/wp-content/uploads/2021/12/photo-2021-12-24-14-53-10.jpg?resize=718%2C1000&ssl=1)
មតិយោបល់