(វ៉ាស៉ីនតោន)៖ មន្ទីរបញ្ចកោណ អាចនឹងបញ្ជូននាវាចម្បាំង យន្តហោះចម្បាំង និងប្រព័ន្ធស៊ើបការណ៍សម្ងាត់ ដើម្បីការពារប្រធានសភាតំណាងរាស្ត្រអាមេរិក លោកស្រី ណាន់ស៉ី ផេឡូស៉ី (Nancy Pelosi) ប្រសិនបើលោកស្រី ពិតជាបំពេញទស្សនកិច្ចមកកាន់កោះតៃវ៉ាន់ តាមការគ្រោងទុកមែននោះ។
មន្រ្តីអាមេរិកមួយរូបបាននិយាយ ក្នុងលក្ខខណ្ឌមិនបញ្ចេញឈ្មោះប្រាប់ AP ឲ្យដឹងថា «ផែនការត្រៀមទុកជាមុន» កំពុងត្រូវបានរៀបចំឡើងដោយយោធាអាមេរិក ដើម្បីការពារលោកស្រី ផេឡូស៊ី កំឡុងការហោះហើរ និងស្នាក់នៅក្នុងករណីដែលលោកស្រីបំពេញទស្សនកិច្ចនៅតៃវ៉ាន់។ មន្រ្តីដដែលរូបនេះបន្ថែមទៀតថា ទោះបីជាយោធាអាមេរិកមានការបារម្ភតិចតួចបំផុតពីលទ្ធភាព ដែលចិនអាចនឹងវាយប្រហារលើយន្ដហោះដឹកលោកស្រី ផេឡូស៊ី ក៏ដោយ ក៏ពួកគេដឹងយ៉ាងច្បាស់ថា ការយល់ច្រឡំណាមួយអាចនឹងបង្កគ្រោះថ្នាក់ដល់លោកស្រី ផេឡូស៊ី។ ដូច្នេះមន្ទីរបញ្ចកោណកំពុងរៀបចំផែនការយោធា ដើម្បីទប់ស្កាត់រាល់គ្រោះថ្នាក់ដែលអាច កើតឡើងជាយថាហេតុណាមួយ។
ទីក្រុងប៉េកាំង ធ្លាប់បានព្រមានម្តងហើយម្តងទៀតថា ដំណើរទស្សនកិច្ចរបស់លោក ផេឡូស៉ី មកកាន់កោះតៃវ៉ាន់ នឹងបង្កឱ្យមានប្រតិកម្មឆ្លើយតបយ៉ាងម៉ឺងម៉ាត់ពីសំណាក់ចិន ហើយថាសហរដ្ឋអាមេរិកនឹងត្រូវទទួលខុសត្រូវលើ «ផលវិបាកគ្រប់យ៉ាង» ប្រសិនបើដំណើរទស្សនកិច្ចរបស់លោកស្រី ផេឡូស៊ី កើតឡើងមែននោះ។
លោកស្រី ផេឡូស៊ី ផ្ទាល់មិនទាន់បញ្ជាក់ជាផ្លូវការថាតើលោកស្រីនឹងបំពេញទស្សនកិច្ចនៅតៃវ៉ាន់ ឬក៏យ៉ាងណានោះទេ។ ប៉ុន្តែ កាលពីសប្ដាហ៍មុន ប្រធានសភាតំណាងរាស្ត្រអាមេរិករូបនេះបានបញ្ជាក់ថាវាពិតជាមានសារសំខាន់បំផុតសម្រាប់អាមេរិក ដែលត្រូវបង្ហាញការគាំទ្រដល់តៃវ៉ាន់៕
AP
![](https://i0.wp.com/postnews.com.kh/wp-content/uploads/2017/01/photo_2017-01-17_14-43-45.jpg?fit=1000%2C563&ssl=1)
![](https://i0.wp.com/postnews.com.kh/wp-content/uploads/2017/01/photo_2017-01-17_14-43-46.jpg?fit=1000%2C563&ssl=1)
![](https://i0.wp.com/postnews.com.kh/wp-content/uploads/2017/01/photo_2017-01-17_14-43-47.jpg?fit=1000%2C563&ssl=1)
![](https://i0.wp.com/domneng.news/wp-content/uploads/2022/07/nancy-pelosi-90812141.jpg?resize=880%2C550&ssl=1)
![](https://i0.wp.com/domneng.news/wp-content/uploads/2022/07/bfdcda6edd.jpg?resize=1000%2C529&ssl=1)
មតិយោបល់