Post News Media ព័ត៌មានជាតិ រថយន្តដឹកឈើគ្...

រថយន្តដឹកឈើគ្រញូង បើកគេចពីការត្រួតពិនិត្យ សមត្ថកិច្ចបាញ់បំបែកកង់ទើបចាប់ជាប់

ស្ទឹងត្រែង: រថយន្តហាយឡែនឌ័រ ដឹកឈើគ្រញូងមួយគ្រឿងចេញពីខេត្តព្រះវិហារ ឆ្លងកាត់ខេត្តស្ទឹងត្រែង និងឆ្លងកាត់ប៉ុស្តិ៍ត្រួតពិនិត្យសមត្ថកិច្ច​ជាច្រើនកន្លែង មិនព្រមឈប់ឲ្យពិនិត្យសមត្ថកិច្ចបាញ់បែកកង់ទៅមុខលេងរួច ទើបចាប់បាន កាលពីវេលាម៉ោង១២រំលងអាធ្រាត្រ ឈានចូលថ្ងៃទី១១ ខែកញ្ញា ឆ្នាំ២០១៦ នៅលើកំណាត់ផ្លូវជាតិលេខ៧៨ ស្ថិតក្នុងភូមិច្រប់ ស្រុកសេសាន ខេត្តស្ទឹងត្រែង ។

សមត្ថកិច្ច បានឲ្យដឹងថា រថយន្តដែលសមត្ថកិច្ចបង្ក្រាបជាប្រភេទរថយន្តហាយឡែនឌ័រ ពណ៌ស្ករ ពាក់ស្លាកលេខ ភ្នំពេញ 2V-8238 ដែលជារថយន្តរបស់ឈ្មួញ​រកស៊ីឈើ​គ្រញូង តែងតែលបលួច ដឹកឈើប្រណិតប្រភេទគ្រញូងចេញពី ខេត្តព្រះវិហា ឆ្ពោះទៅ ខេត្តរតនគីរី នៅពេលយប់ជ្រៅស្ងាត់ ។

សមត្ថកិច្ច បានបន្តឲ្យដឹងទៀតថា នៅយប់កើតហេតុគេមានរថយន្តមួយគ្រឿងនេះ បានបើកយ៉ាងលឿន ឆ្លងកាត់ប៉ុស្តិ៍ត្រួតពិនិត្យអាវុធជាតិផ្ទុះក្នុងស្រុកថាឡាបរិវ៉ាត់ និងឆ្លង​កាត់​ក្រុងស្ទឹងត្រែង មិនព្រមឈប់ឲ្យសមត្ថកិច្ចត្រួតពិនិត្យទេ បែរជាបន្ថែមល្បឿនបោះពួយយ៉ាងលឿន គេចពីសមត្ថកិច្ចទៅវិញ។ ក្រោយពីដល់ប៉ុស្តិ៍ត្រួតពិនិត្យត្រង់​ចំណុច​ខាងលើ ត្រូវបានអាវុធហត្ថនៅទីនោះឃាត់ក៏មិនឈប់ឲ្យសមត្ថកិច្ចពិនិត្យដែរ នៅតែបន្ថែមល្បឿន យ៉ាងលឿន ខណ:នោះនគរបាលមូលដ្ឋានដែលប្រចាំការនៅក្បែរ នោះបា​​​ន​ដេញតាមមិនព្រមឈប់ ក៏បានបាញ់មួយគ្រាប់បំបែកកង់ផ្នែកខាងមុខខាងស្តាំ តែគេនៅតែបន្ថែមទាំងកង់បែកល្បឿនទៅមុខ របូតសំបកកង់ចេញនៅសល់តែខ្នងកង់ បាន​ចម្ងា​​យ​ប្រមាណជា៦ទៅ៧គីឡូម៉ែត្រទៅមុខលែងរួច ទើបរថយន្តឈប់ក៏ត្រូវបានសមត្ថកិច្ចក្របួចជាប់តែម្តង។ ប៉ុន្តែម្ចាស់រថយន្តបានបើកទ្វា រត់ គេចខ្លួនបាត់ ស្រមោល​បន្សល់​ទុកតែរថយន្តនិងឈើគ្រញូង តែប៉ុណ្ណោះ។

បន្ទាប់ពីបង្ក្រាបរថយន្តដឹកឈើគ្រញូងនោះ រួចមក ក៏មានរថយន្តមួយគ្រឿងទៀត ម៉ាកកាម៉ារីបាឡែនជិះគ្នា៣នាក់ ជារថយន្តកែច្នៃខុសលក្ខណ:បច្ចេកទេសទាំងស្រុង គ្មានស្លាកលេខ គ្មានកៅអីក្រោយ ច្នៃសម្រាប់ដឹងឈើ ដែលគេសង្ស័យថា មករំដោះឈើពីរថយន្តដែលបង្ក្រាប ក៏ត្រូវបានសមត្ថកិច្ចឃាត់ផងដែរ។ រថយន្ដដឹកឈើខាងលើ​ត្រូវបានសមត្ថកិច្ចយករថយន្តស្ទូច ដឹកយកមករក្សារទុកនៅស្នងការដ្ឋាននគរបាលខេត្តស្ទឹងត្រែង។ ឈើបង្ក្រាប បានប្រគល់ឲ្យជំនាញរដ្ឋបាលព្រៃឈើ ដែលមានឈើចំនួន​២៤ដុំស្មើ១ម៉ែត្រគូប៤៥៥ក្នុងនោះមានឈើនាងនួនជាង៨ផ្លាន ៕

ចាប់ឈើក្រញូង

ចាប់ឈើក្រញូង

ចាប់ឈើក្រញូង

ចាប់ឈើក្រញូង

ចាប់ឈើក្រញូង

ចាប់ឈើក្រញូង