ភ្នំ្នពេញៈ គ្រោះថ្នាក់ចរាចរណ៍មួយ បង្ករឡើងដោយរថយន្តក្រឡុកស៊ីម៉ង់ត៍ មួយគ្រឿងរបស់ក្រុមហ៊ុន Home Master Group បើកខ្វះការប្រុងប្រយត្ន័ទៅបុកជនជាតិវៀតណាម២នាក់ បណ្តាលឲ្យស្លាប់ម្នាក់ និងម្នាក់ទៀតរងរបួសធ្ងន់ ចំណែកជនបង្កបន្ទាប់ពីបើកបុកគេស្លាប់ហើយរត់បាត់ស្រមោល។ ហេតុការណ៍គ្រោះថ្នាក់ចរាចរណ៍ខាងលើនេះ បានកើតឡើងនៅកាលពីវេលាម៉ោង ៨និង៥០នាទីព្រឹក ថ្ងៃទី១៩ ខែកញ្ញា ឆ្នាំ២០១៦ ស្ថិតនៅតាមបណ្តោយផ្លូវជាតិលេខ៦ នៅត្រង់ចំណុចមុខបុរី ឌឺ មេគង្គ រ៉ូយ៉ាល់ ក្នុងភូមិខ្ទរ សង្កាត់ព្រែកលៀប ខណ្ឌជ្រោយចង្វារ រាជធានីភ្នំពេញ។
ប្រភពព័ត៌មានពីសមត្ថកិច្ចបានឲ្យដឹងថា មុនពេលកើតហេតុគេឃើញរថយន្តក្រឡុកស៊ីម៉ង់ត៍ មួយគ្រឿងម៉ាក ហ៊ីណូពណ៌ស្ករ ជាប្រភេទ ក្រឡុកស៊ីម៉ង់ត៍របស់ក្រុមហ៊ុន Home Master Group ដែលពាក់ស្លាកលេខ ភ្នំពេញ 5A-1272 ដោយត្រូវបានស្គាល់ឈ្មោះថា ស៊ី សំណាង ភេទប្រុស អត្តលេខ១០៤៤ បានបើកបរចេញពីក្នុង បុរីឌឺមេគង្គ រ៉ូយ៉ាល់ ឆ្លងផ្លូវជាតិលេខ៦ ក្នុងល្បឿនយ៉ាងលឿនក្នុងទិសដៅពីលិចទៅកើត ចំណែកជនរងគ្រោះ២នាក់ ជិះម៉ូតូ មួយគ្រឿង ម៉ាក សង់កូរ៉េ ពណ៌ក្រហម ពាក់ស្លាកលេខ កណ្តាល 1H-1253 ដឹកអំពៅពីជើងទៅត្បូង។ លុះមកដល់ចំណុចកើតហេតុខាងលើ ជនរងគ្រោះជិះទន្ទឹមទល់មុខបុរី ស្រាប់តែរថយន្តក្រឡុកស៊ីម៉ង់ត៍បានបើកចេញពីក្នុងបុរី ឌឺមេគង្គរ៉ូយ៉ាល់ បុកកិនម៉ូតូជនរងគ្រោះ និងអ្នកបើកបរយ៉ាងពេញទំហឹងបណ្តាលឲ្យស្លាប់ភ្លាមៗ នៅខាងក្រោមរថយន្ត និងម្នាក់ទៀតរបួសធ្ងន់។ បន្ទាប់ពីកើតហេតុម្ចាស់រថយន្តក្រឡុកស៊ីម៉ង់ត៍បានបើករថយន្តទៅឈប់ខាងស្តាំ ហើយរត់ចូលទៅក្នុងបុរីបាត់ ដោយបន្សុល់ទុកតែរថយន្ត និងម៉ូតូជនរងគ្រោះនៅកន្លែងកើតហេតុតែប៉ុណ្ណោះ។
សមត្ថកិច្ចបានឲ្យដឹងថា ជនរងគ្រោះដែលស្លាប់បាត់បង់ជីវិតខាងលើនេះ មានឈ្មោះ ង្វៀង យុាំងថាន់ ភេទប្រុស អាយុ១៧ឆ្នាំ ស្នាក់នៅភូមិបាក់ខែងលើ សង្កាត់ព្រែកលៀប ខណ្ឌជ្រោយចង្វារ ដែលមានទីលំនៅភូមិអរីយ៍ក្សត្រ័ ឃុំអរីយ៍ក្សត្រ័ ស្រុកល្វាឯម ខេត្តកណ្តាល និងម្នាក់ទៀតដែលរងរបួសធ្ងន់មានឈ្មោះ ជួវ យុាំងវិន ភេទប្រុស អាយុ ១៤ឆ្នាំ រស់នៅជាមួយគ្នា។
ក្រោយពីហេតុការណ៍នេះកើតឡើង សមត្ថកិច្ចនគរបាលចរាចរណ៍មូលដ្ឋាន សហការជាមួយនិងនគរបាលចរាចរណ៍រាជធានីភ្នំពេញ ចុះទៅកន្លែងកើតហេតុ និងបានធ្វើការវាស់វែង ហើយយករថយន្តបង្ក និងម៉ូតូជនរងគ្រោះទៅរក្សាទុកនៅការិយាល័យនគរបាលចរាចរក្រុង ដើម្បីរង់ចាំការដោះស្រាយគ្នា ចំណែកឯសាកសពជនរងគ្រោះ ត្រូវបានសមត្ថកិច្ចប្រគល់ឲ្យទៅក្រុមគ្រួសារដឹកយកទៅតម្កល់ទុកនៅសង្កាត់ព្រែកឯង ដើម្បីធ្វើបុណ្យតាមប្រពៃណី ៕
https://youtu.be/v7H1SB4K4Lo
មតិយោបល់