បន្ទាយមានជ័យ: បុរសម្នាក់ត្រូវបានដេកស្លាប់យ៉ាងអាណោចអាធ័មកណ្ដាលផ្លូវ ក្រោយពីរថយន្តបុក កាលពីវេលាម៉ោង១១៖១៥នាទីយប់ថ្ងៃទី២៣ ខែកញ្ញា ឆ្នាំ២០១៦ លើកំណាត់ផ្លូវជាតិលេខ5 ត្រង់ចំណុចខាងលិចវត្តផ្សារកណ្តាលប្រហែល១០០ម៉ែត្រ ស្ថិតក្នុងភូមិផ្សារកណ្តាល សង្កាត់ផ្សារកណ្ដាល ក្រុងប៉ោយប៉ែត ខេត្តបន្ទាយមានជ័យ។

លោកវរសេនីយ៍ត្រី ជា ដា មេបញ្ជាការមូលដ្ឋានកងរាជអាវុធហត្ថក្រុងបានឲ្យដឹងថា ករណីគ្រោះថ្នាក់ចរាចរណ៍នេះ បានកើតឡើងរវាងរថយន្តមួយគ្រឿងមិនចាំម៉ាកបុកមនុស្ស បណ្ដាលឲ្យស្លាប់។ លោក បានឲ្យដឹងទៀតថា ជនរងគ្រោះពុំស្គាល់អត្តសញ្ញាណ ភេទប្រុស។

លោកបានបញ្ជាក់ទៀតថា គ្រោះថ្នាក់ចរាចរណ៍នេះ មិនដឹងពីមូលហេតុ ដោយសារតែរថយន្តបង្ក ក្រោយកើតហេតុបើកគេចខ្លួនបាត់។ សាកសព ត្រូវបានយកទៅរក្សាទុកនៅវត្តត្រាច ដើម្បីរង់ចាំសាច់ញាតិមកទទួលយកទៅធ្វើបុណ្យតាមប្រពៃណី៕