ភ្នំពេញ: ជនសង្ស័យចំនួន២នាក់ ត្រូវបានកម្លាំងនគរបាលប៉ុស្តិ៍ទឹកថ្លា ធ្វើការចាប់ឃាត់ខ្លួន បន្ទាប់ពីត្រួតពិនិត្យរកឃើញសម្ភារ:សម្រាប់ធ្វើសកម្មភាពគាស់សោរទ្វារដើម្បីលួចទ្រព្យសម្បត្តិប្រជាពលរដ្ឋនៅជាប់នឹងខ្លួន ។ ការចាប់ខ្លួននេះបានធ្វើឡើងកាលពីវេលាម៉ោង ១២និង៣០នាទីរំលងអាធ្រាត ឈានចូលថ្ងៃទី៦ ខែតុលា ឆ្នាំ២០១៦ ស្ថិតនៅតាមបណ្តោយផ្លូវណតប្រ៊ីត ស្ថិតក្នុងសង្កាត់ទឹកថ្លា ខណ្ឌសែនសុខ រាជធានីភ្នំពេញ។
សមត្ថកិច្ចនគរបាលប៉ុស្តិ៍ទឹកថ្លា បានឲ្យដឹងថាជនសង្ស័យទាំង២នាក់ ដែលចាប់ឃាត់ខ្លួនបានខាងលើនេះ ទី១ឈ្មោះ ជោ សំណាង អាយុ១៧ឆ្នាំ មុខរបររត់ម៉ូតូឌុប ស្នាក់នៅម្ដុំសាលាសាមគ្គី ខណ្ឌទួលគោក ស្រុកកំណើតភូមិអង្គទង ស្រុកគងពិសី ខេត្តកំពង់ស្ពឺ ។ និងជនសង្ស័យទី២ឈ្មោះ កែវ រតន: អាយុ១៥ឆ្នាំ មុខរបរមិនពិតប្រាកដ ស្នាក់នៅម្ដុំភូមិត្រពាំងឈូក ស្រុកកំណើតនៅខេត្តកំពង់ចាម។
សមត្ថកិច្ចបានបន្តឲ្យដឹងថា មុននឹងឈានដល់ការចាប់ខ្លួនបានជនសង្ស័យខាងលើ កម្លាំងនគរបាលប៉ុស្តិ៍ទឹកថ្លា សហការជាមួយនឹងកងអន្តរាគមន៍ខណ្ឌសែនសុខ បានធ្វើការជិះល្បាតការពារក្នុងមូលដ្ឋានលុះបានមកដល់ចំណុចកើតហេតុ ក៏ប្រទះឃើញជនសង្ស័យទាំង២នាក់កំពុងជិះម៉ូតូ១មួយគ្រឿងម៉ាក វីវ៉ា ពណ៌ខ្មៅ អត់ភ្លើងមុខ ដោយមានការសង្ស័យកម្លាំងបានធ្វើការដេញស្ទាក់និងធ្វើការឆែកឆេរត្រួតពិនិត្យរកឃើញ ដែកសម្រាប់ឆ្កឹះសោរបន្ទប់ចំនួន០១ ហើយថ្នាំញៀន១កញ្ចប់ តែត្រូវបាន ជនសង្ស័យគប់ចោលទៅក្នុងគុម្ពព្រៃរកមិនឃើញ។
បច្ចុប្បន្នជនសង្ស័យទាំង២នាក់ រួមនឹងវត្ថុតាង ត្រូវបានសមត្ថកិច្ចនគរបាលប៉ុស្តិ៍ទឹកថ្លាធ្វើការសាកសួរ និងកសាងសំណុំរឿងបញ្ជូនខ្លួនទៅកាន់ អធិការដ្ឋាននគរបាលខណ្ឌសែនសុខ ដើម្បីឃុំខ្លួនបណ្តោះអាសន្ន និងកសាងសំណុំរឿងបញ្ជូនខ្លួនទៅកាន់ តុលាការចាត់ការតាមផ្លូវច្បាប់ ៕
មតិយោបល់