ភ្នំពេញ: លោកទេសរដ្ឋមន្ត្រី ស៊ុន ចាន់ថុល បានជួបពិភាក្សាការងារជាមួយលោក Dany Samuel នាយកប្រតិបត្តិនៃក្រុមហ៊ុនអន្តរជាតិ ITNL Pte Ltd លោក Tran The Thanh នាយករងនៃក្រុមហ៊ុនអន្តរជាតិ ITNL លោក Jesudas Bell ប្រធាន និងជានាយកប្រតិបត្តិនៃក្រុមហ៊នអន្តរជាតិ Futurelinks Pte Ltd ដោយមានការអមដំណើរពីលោក N Sitlhou លេខាទីមួយនៃស្ថានទូតឥណ្ឌាប្រចាំកម្ពុជា នាថ្ងៃទី៦ ខែតុលា ឆ្នាំ២០១៦ នៅទីស្តីការក្រសួងសាធារណការ និងដឹកជញ្ជូន។

លោក Samuel បានជម្រាបជូនលោកទេសរដ្ឋមន្រ្តី អំពីគំនិត និងបញ្ហាអាទិភាពរបស់ក្រុមហ៊ុននេះ និងបានសម្តែងចំណាប់អារម្មណ៍របស់ខ្លួន នៅក្នុងការពិចារណាលើឱកាសថ្មីនៃការវិនិយោគលើវិស័យហេដ្ឋារចនាសម្ព័ន្ធនៅកម្ពុជា។

លោក Samuel បានណែនាំឲ្យស្គាល់នូវផលិតផលរបស់ខ្លួន ដែលមានឈ្មោះថា Macroseal ជាសារធាតុការពារគុណភាពផ្លូវថ្នល់ (customized microsurfacing solution) ដែលអាចធ្វើឲ្យប្រសើរឡើងដល់គុណភាពនៃការសាងសង់ផ្លូវ។ លោកបានកត់សម្គាល់ថាផលិតផលនេះជួយការពារផ្ទៃលើនៃផ្លូវថ្នល់ឲ្យជាប់បានយូរអង្វែង។

លោកទេសរដ្ឋមន្រ្តី ស៊ុន ចាន់ថុល បានសម្តែងការកោតសរសើរចំពោះលោក Samuels ដែលបានផ្តល់ព័ត៌មាននេះ និងបានស្នើឲ្យក្រុមហ៊ុននេះផ្ដល់ប៉ាន់ផលិតផលមួយសម្រាប់ធ្វើតេស្តនៅកម្ពុជា៕