ភ្នំពេញៈ ជនសង្ស័យម្នាក់ជាមុខសញ្ញាជួញដូរគ្រឿងញៀន និង២នាក់ទៀតជាអ្នកប្រើប្រាស់ ត្រូវបានកម្លាំងនគរបាលខណ្ឌពោធិ៍សែនជ័យ តាមបង្ក្រាបចាប់ខ្លួន ចំណែកឯបក្ខពួកម្នាក់ទៀតរត់គេចខ្លួនបាត់ កាលពីវេលាម៉ោង១២និង៣០នាទីរសៀលថ្ងៃទី០៦ ខែតុលា ឆ្នាំ២០១៦ ស្ថិតនៅត្រង់ចំណុចដីឡូត៍មួយកន្លែងខាងក្រោយវត្តអង្គតាគៀត ភូមិអង្គត្រគៀត សង្កាត់កន្ទោក ខណ្ឌពោធិ៍សែនជ័យ រាជធានីភ្នំពេញ ។
សមត្ថកិច្ចបានឲ្យដឹងថា ជនសង្ស័យទាំង៣នាក់ដែលចាប់ខ្លួនបានខាងលើនេះ ទី១ឈ្មោះ ឡាង រស្មី ភេទប្រុស អាយុ៤១ឆ្នាំ មុខរបរ រត់ម៉ូតូឌុប ស្នាក់នៅភូមិថ្មគោល សង្កាត់ចោមចៅ ខណ្ឌពោធិ៍សែនជ័យ ពាក់ពន្ធ័នឹងករណីជួញដូរគ្រឿងញៀន។ ដកហូតបាន ថ្នាំញៀន១១កញ្ចប់តូច ម៉ូតូមួយគ្រឿងម៉ាកហុងដា សេ១២៥ ស៊េរី២០១០ ពណ៌ខ្មៅ ពាក់ស្លាកលេខ កំពត 1C-9423 ។
ដោយឡែក ជនសង្ស័យ២នាក់ទៀត ខណៈដែលកម្លាំងនគរបាលចុះទៅបង្ក្រាប បានព្យាយាមរត់គេចតែបើតាម ជនសង្ស័យ ឡាង រស្មី បានឲ្យដឹងថា មនុស្ស២នាក់ ទៀតនោះជាម៉ូយរបស់គេ រង់ចាំទទួលទិញថ្នាំយកទៅ ប្រើប្រាស់ឬចែកចាយបន្ត ត្រូវបានកម្លាំងនគរបាលជំនាញ និងកម្លាំងប៉ុស្តិ៍រដ្ឋបាល តាមស្វែងចាប់ខ្លួនត្រង់ចំណុចក្លោងទ្វារវត្តអង្គត្រគៀត កែងផ្លូវជាតិលេខ៣ ខណៈដែលជនសង្ស័យព្យាយាមបើករថយន្តគេចខ្លួន ។ ជនសង្ស័យទាំង២នាក់នេះ ទី១ ឈ្មោះធា រី ភេទប្រុស អាយុ៣០ឆ្នាំ មុខរបរបើកបររថយន្តដឹកកម្មកររោងចក្រ មានទីលំនៅ ភូមិអង្គក្តី ឃុំទួលអំពិល ស្រុកបរសេដ្ឋ ខេត្តកំពង់ស្ពឺ ។ ទី២ ឈ្មោះ ជឹម បូរ៉ា ភេទប្រុស អាយុ២៥ឆ្នាំ មានទីលំនៅ ភូមិត្រពាំងសាប ឃុំត្រពាំងសាប ស្រុកបាទី ខេត្តតាកែវ ។
ក្នុងប្រតិបត្តិការបង្ក្រាបខាងលើ ជនសង្ស័យ៣នាក់ ម្នាក់ជួញដូរ ២នាក់ទៀតប្រើប្រាស់គ្រឿងញៀន ត្រូវបានឃាត់ខ្លួន សម្ភារៈដកហូត មានថ្នាំញៀនចំនួន១១កញ្ចប់ ម៉ូតូ១គ្រឿង រថយន្តកូរ៉េ ម៉ាកហ៊ីយ៉ាន់ដាយ ពណ៌ស ចំណុះ១តោន អត់មានពាក់ស្លាកលេខ១គ្រឿង ។
សមត្ថកិច្ចបានឲ្យដឹងថា ក្រោមបញ្ជារបស់លោក យឹម សារ៉ាន់ អធិការនគរបាលខណ្ឌពោធិ៍សែនជ័យ បង្ក្រាបទប់ស្កាត់រាល់បទល្មើស ដើម្បីរក្សាសន្តិសុខសុវត្ថិភាពជូនប្រជាពលរដ្ឋនិងសង្គម ទើបកម្លាំងនគរបាលជំនាញខណ្ឌពោធិ៍សែនជ័យ និងកម្លាំងប៉ុស្តិ៍រដ្ឋបាលកន្ទោក ក្រោមការដឹកនាំផ្ទាល់ ដោយលោក ម៉ន វុធី អធិការរងខណ្ឌ ចុះប្រតិបត្តិការបង្ក្រាប ករណីជួញដូរ ប្រើប្រាស់គឿងញៀនខាងលើបាន៣នាក់ ។
ក្រោយពីឃាត់ខ្លួនបាន ជនសង្ស័យទាំង៣នាក់ និងវត្ថុតាងត្រូវបាននគរបាលនាំខ្លួនទៅសាកសួរនៅផ្នែកជំនាញ អធិការដ្ឋានខណ្ឌពោធិ៍សែនជ័យ ដើម្បីកសាងសំណុំរឿងចាត់ការទៅតាមនីតិវិធី ៕
https://youtu.be/j3SHKjfU-WY
មតិយោបល់