ត្បូងឃ្មុំៈ ដោយអនុវត្តតាមគោលនយោបាយភូមិឃុំមានសុវត្ថិភាពទាំង៩ចំណុ​ចរបស់រាជរដ្ឋា​ភិបាល​កម្ពុជា កម្លាំងសមត្ថកិច្ចនគរបាលមូលដ្ឋាន សហការណ៍ជាមួយកម្លាំងនគរបាលនៅតាមបណ្ដាស្រុក ចុះ​បង្ក្រាប​មុខសញ្ញាជាប់ពាក់ព័ន្ធករណីគ្រឿងញៀនជាបន្តបន្ទាប់ ដោយឃាត់ខ្លួនជនសង្ស័យចំនួន៤នាក់ ដែលជន​សង្ស័យ​២នាក់ត្រូវឃាត់ខ្លួនតាមដីកា និង២នាក់ផ្សេងទៀតត្រូវបានឃាត់ខ្លួនជាក់ស្ដែងជាមួយវត្ថុតាងថ្នាំញៀន។

សមត្ថកិច្ចបានឲ្យដឹងថា ជនសង្ស័យចំនួន២នាក់ជាមួយវត្ថុតាងថ្នាំញៀនប្រភេទម្សៅក្រាមពណ៌សចំនួន១កញ្ចប់ធំ ត្រូវបានកម្លាំងជំនាញនៃអធិការដ្ឋាននគរបាលស្រុកពញាក្រែក ធ្វើការឃាត់ខ្លួន កាលពីវេលាម៉ោង១និង៣០នាទី រសៀលថ្ងៃទី៦ តុលា ២០១៦ នៅភូមិរោងចក្រ ឃុំក្រែក ស្រុកពញាក្រែក ខេត្តត្បូងឃ្មុំ ។

ដោយឡែកជនសង្ស័យចំនួន២នាក់ទៀតត្រូវបានសមត្ថកិច្ចឃាត់ខ្លួនតាមអំណាចដីការបស់សាលាដំបូងខេត្តត្បូងឃ្មុំ ពីបទរក្សាទុក ជួញដូរដោយខុសច្បាប់នូវសារធាតុញៀន ដែលជនសង្ស័យទី១-ឈ្មោះសះ ណាវី ភេទប្រុស អាយុ​៣១ឆ្នាំ មុខរបរជាងដំដែក នៅភូមិដងកាំបិត ត្រូវបានកម្លាំងជំនាញនៃអធិការដ្ឋាននគរបាលស្រុកត្បូងឃ្មុំ ចាប់ឃាត់​ខ្លួនកាលពីវេលាម៉ោង២និង៣០នាទីរសៀល ថ្ងៃទី៦ តុលា ២០១៦ នៅភូមិដងកាំបិត ឃុំស្រឡប់ ស្រុក-ខេត្ត​ត្បូង​ឃ្មុំ។ ជនសង្ស័យទី២-ឈ្មោះលន់ នឿន ភេទប្រុស អាយុ៣៤ឆ្នាំ ត្រូវបានកម្លាំងជំនាញនៃអធិការដ្ឋាននគរបាល​ក្រុងសួង ចាប់ឃាត់ខ្លួនកាលពីវេលាម៉ោង៨និង៥០នាទីព្រឹក ថ្ងៃទី៦ តុលា ២០១៦ នៅភូមិជ្រួយ សង្កាត់វិហារ​លួង ក្រុងសួង ខេត្តត្បូងឃ្មុំ។

បច្ចប្បន្នជនសង្ស័យទាំង៤នាក់ត្រូវបានកម្លាំងជំនាញនៃស្នងការដ្ឋាននគរបាលខេត្តត្បូងឃ្មុំ កសាងសំណុំរឿង​បញ្ជូនខ្លួន​ទៅកាន់សាលាដំបូងខេត្តចាត់ការតាមនិតិវិធីច្បាប់៕