បន្ទាយមានជ័យ: កម្មវិធីអភិវឌ្ឍន៍សេដ្ឋកិច្ចតំបន់ ដំណាក់កាលទី៣ នៅក្នុងខេត្តបន្ទាយមានជ័យត្រូវបានគណ:ប្រតិភូអាល្លឺម៉ង់ ចុះស្វែងយល់ជាក់ស្តែងជាមួយរដ្ឋបាលខេត្តបន្ទាយមានជ័យ កាលពីរសៀលថ្ងៃទី៦ ខែតុលា ឆ្នាំ២០១៦ម្សិលមិញនេះ។
ប្រតិភូអាល្លឺម៉ង់ដែលដឹកនាំដោយលោក ប្យ៉ន សៀលបឺក (Mr Bjorn Schilberg ) ទីប្រឹក្សាជាន់ខ្ពស់ផ្នែក គោលនយោបាយសម្រាប់កម្ពុជា នៃក្រសួងសេដ្ឋកិច្ច កិច្ចសហប្រតិបត្តិការនិងអភិវឌ្ឍ លោកស្រី បឺរហ្គីដ ស្ត្រ៊ប (Mrs Birgit Strub)លេខាទូត នៃស្ថានទូតប្រចាំនៅកម្ពុជា លោកស្រីម៉ាទីណា អាក្រែល អ្នកគ្រប់គ្រងប្រចាំកម្ពុជា នៃអង្គការ GIZ លោក វិត វុទ្ធី អគ្គលេខាធិការរងនៃគណ:កម្មាធិការនីតិសម្បទា និងអភិវឌ្ឍកម្ពុជា នៃក្រុមប្រឹក្សាអភិវឌ្ឍកម្ពុជា(CDC)។
លោក លី សារី អភិបាលរងខេត្តបន្ទាយមានជ័យ និងជាអ្នកសម្របសម្រួលគម្រោងថ្នាក់ខេត្ត បានឲ្យដឹងថា លទ្ធផលគម្រោងអភិវឌ្ឍសេដ្ឋកិច្ចតំបន់ដែលជាជំនួយរបស់អាល្លឺម៉ង់នៅខេត្តនេះ ទទួលបានកិច្ចសហប្រតិបត្តិការរលូនល្អ និងចំគោលដៅដែលពលរដ្ឋ ជំនាញពាក់ព័ន្ធនិងអាជ្ញាធរចង់បានដូចជា គម្រោងក្រវាត់បៃតង នៃកសិកម្មខ្នាតតូច អគារសិក្សា និងសេវាអប់រំ គាំពារតំបន់សេដ្ឋកិច្ចពិសេស ផ្លូវលំ លូ ប្រឡាយ។ល។
លោក អាដែលបឺត អេបឺតហាត នាយកគ្រប់គ្រងប្រចាំប្រទេសកម្ពុជា នៃអង្គការ GIZ ថ្លែងថា រដ្ឋាភិបាលសហព័ន្ធអាល្លឺម៉ង់ ក៏ដូចជាស្ថានទូតអង្គការ GIZ នៅតែបន្តគាំទ្រនិងជាដៃគូអភិវឌ្ឍន៍របស់ខេត្តនេះ ក៏ដូចនៅទូទាំងប្រទេសកម្ពុជាផងដែរ។ ប៉ុន្តែដោយថវិកាបន្តមានកម្រិតដូច្នេះ សុំខេត្តកំណត់គោលដៅសំខាន់ដែលត្រូវការខ្លាំង។
លោកបន្តថា បំណងទស្សនកិច្ចសិក្សានេះ ដើម្បីស្វែងយល់បន្ថែមលើគម្រោងអភិវឌ្ឍន៍សេដ្ឋកិច្ចតំបន់ ដំណាក់កាលពីទី៣ នៅខេត្តនេះថា តើធ្វើអ្វីបានខ្លះ ប្រឈមអ្វីខ្លះ ត្រូវធ្វើអ្វីខ្លះបន្តដើម្បីជួយលើកកម្ពស់ ជីវភាពពលរដ្ឋតាមរយ:សេដ្ឋកិច្ច ហេដ្ឋារចនាសម្ព័ន្ធ និងសង្គមកិច្ច។
លោក សួន បវរ អភិបាលខេត្តបន្ទាយមានជ័យ មានប្រសាសន៍ថា កម្ពុជាក៏ដូចខេត្តមានថវិកា ឬមូលនិធិអភិវឌ្ឍន៍ របស់ខ្លួនដែរ តែនៅមិនគ្រប់គ្រាន់ ហើយត្រូវជំនួយពីដៃគូអភិវឌ្ឍន៍ និងប្រទេសនានា ក្នុងនោះជំនួយរបស់ GIZ និងទីភ្នាក់ងារ អាល្លឺម៉ង់ផ្សេងទៀត បានជួយពង្រឹង និងពង្រីកឲ្យជីវភាព ពលរដ្ឋប្រែប្រួលរីកចម្រើនជាលំដាប់។
លោកអភិបាលខេត្ត បានថ្លែងអំណរគុណយ៉ាងជ្រាលជ្រៅដល់អាល្លឺម៉ង់ដែលមានគោលនយោបាយជួយអភិវឌ្ឍន៍កម្ពុជា និងជាពិសេសខេត្តបន្ទាយមានជ័យនេះផងដែរ។
លោក បានស្នើសុំដៃគូឲ្យពង្រីកនិងបន្តនិរន្តរភាពគម្រោង ក្នុងនោះខេត្តក៏ចង់ឲ្យ GIZ ជួយដល់មជ្ឈមណ្ឌល បណ្តុះបណ្តាលវិជ្ជាជីវ:តាមស្រុក ក្រុងដើម្បីជួយយុវជន និងពលរដ្ឋឲ្យមានចំណេះ ជំនាញទៅប្រកបជីវភាព ការងារបានជួយកសិករដែលរងគ្រោះដោយបម្រែបម្រួលអាកាសធាតុ។
នៅរសៀលថ្ងៃដដែលនោះដែរ ប្រតិភូអាល្លឺម៉ង់ដឹកនាំដោយលោកប្យ៉ុន សៀលបឺក និងជូនដំណើរដោយលោក លី សារី អភិបាលរងខេត្ត បានបន្តទៅទស្សនកិច្ចស្វែងយល់សង្វាក់ការងារ និងស្ថានភាពនិយោជិកនៅរោងចក្រខេមផេក ផលិតសំបកវេចខ្ចប់អលង្ការ និងវត្ថុអនុស្សាវរីយ៍ នៃតំបន់សេដ្ឋកិច្ច ពិសេសអូរនាង-ប៉ោយប៉ែត និងពិនិត្យវាយតម្លៃផ្លូវលំ១ខ្សែ ប្រវែងជាង១០គ.ម ដែលនឹងជួសជុលឡើងវិញដោយគម្រោង (RIP IV)៕
មតិយោបល់