ភ្នំពេញៈ ដោយមើលឃើញពីភាពគ្មានសណ្តាប់ធ្នាប់ នៅក្នុងមូលដ្ឋាន ដោយសារតែក្រុមអាជីវករ ក៏ដូចជាម្ចាស់ហាងមួយចំនួន រំលោភយកចិញ្ចើមផ្លូវសាធារណៈ ដាក់តាំងរបស់របរ លក់ដូរ ឬ ដាំស្លាកយីហោ រញ៉េរញ៉ៃ បាត់បង់សណ្តាប់ធ្នាប់សាធារណៈ ទើបព្រឹកថ្ងៃទី៧ ខែតុលា ឆ្នាំ២០១៦ អាជ្ញាធរខណ្ឌសែនសុខ ដឹកនាំដោយលោក សាំង សុភៈវិចិត្រ អភិបាលរងខណ្ឌ បានដឹកនាំមន្ត្រីសាលាខណ្ឌ សង្កាត់ទឹកថ្លា និងកម្លាំងសណ្តាប់ធ្នាប់សាលាខណ្ឌ ប្រមាណជាង ៣០នាក់ កាត់ស្លាក យីហោ អាជីវកម្ម ផ្សេងៗ ដែលក្រុមអាជីវករដាំរំលោភចិញ្ចើមផ្លូវសាធារណៈ យកទៅរក្សាទុកនៅសាលាខណ្ឌ ដើម្បីចាត់ការតាមនីតិវិធី ។

លោក សាំង សុភៈវិចិត្រ អភិបាលរងខណ្ឌសែនសុខប្រាប់ឲ្យដឹងថា ការដែលលោកដឹកនាំមន្ត្រីសាលាខណ្ឌ សង្កាត់ និងកម្លាំងសណ្តាប់ធ្នាប់សាលាខណ្ឌ ចុះមករុះរើ កាត់ស្លាកយីហោ អាជីវកម្ម និង ប៉ាន់ណូផ្សេងៗ ដែលដាំរំលោភចិញ្ចើមផ្លូវសាធារណៈនេះ គឺដោយយោងទៅតាមសេចក្តីជូនដំណឹងរបស់សាលាខណ្ឌសែនសុខ ស្តីពីការរៀបចំសណ្តាប់ធ្នាប់តាមចិញ្ចើមផ្លូវសាធារណៈ ក្នុងមូលដ្ឋាន ណែនាំបងប្អូនអាជីវករជាច្រើនលើកច្រើនសាររួចមកហើយ ប៉ុន្តែការណែនាំនេះ មិនត្រូវបានបងប្អូនអាជីវករអនុវត្តន៍តាមនោះទេ ។ ទើបរូបលោកទទួលបានបញ្ជាពីលោក ប៉ឹល កុសល អភិបាល នៃគណៈអភិបាលខណ្ឌសែនសុខ ដឹកនាំកម្លាំងចុះរៀបចំសណ្តាប់ធ្នាប់បែបនេះតែម្តង ។

លោកអភិបាលរងខណ្ឌសែនសុខប្រាប់បន្តឲ្យដឹងថា ថ្ងៃដំបូងនេះកម្លាំងរបស់លោកចាប់ផ្តើមចុះរៀបចំ សណ្តាប់ធ្នាប់ នៅលើកំណាត់ផ្លូវសហព័ន្ធរុស្ស៊ី ចាប់ពីគល់ស្ពានអាកាស៧មករា រហូតដល់ផ្លូវបំបែក ភ្នំពេញហាណូយ ក្នុងនោះកាត់បានផ្ទាំងប៉ាន់ណូមួយចំនួន យកទៅរក្សាទុកនៅសាលាខណ្ឌសែនសុខ ដើម្បីចាត់ការតាមច្បាប់ ។ ក្នុងនោះដែរក្រុមការងាររបស់លោកក៏បានបាញ់ថ្នាំធ្វើជាគំនូសសញ្ញា កំណត់ការលក់ដូរ ដើម្បីកំណត់កន្លែងតាំងទំនិញលក់ជូនបងប្អូនអាជីវករផងដែរ ចៀសវាងការលក់រំលោភបំពាននៅលើចិញ្ចើមផ្លូវសាធារណៈបន្តទៀត។

នាឪកាសនោះលោកអភិបាលរងខណ្ឌសែនសុខ ក៏បានអំពាវនាវផងដែរទៅដល់ក្រុមអាជីវករ ដើម្បីរក្សាបាននូវសណ្តាប់ធ្នាប់ របៀបរាបរយ និង សោភ័ណ្ឌភាពតាមចិញ្ចើមផ្លូវសាធារណៈឲ្យបានល្អប្រសើរឡើងវិញ សាលាខណ្ឌសែនសុខ សូមធ្វើការណែនាំដល់បងប្អូនប្រជាពលរដ្ឋ និងអាជីវករទាំងអស់ ចូលរួមអនុវត្តដូចខាងក្រោម ទី១.ហាមដាច់ខាតយកចិញ្ចើមផ្លូវសាធារណៈធ្វើជាទីតាំងប្រកបអាជីវកម្មគ្រប់ប្រភេទ និងលើកផ្លាកយីហោ។ ទី២.ត្រូវបញ្ឈប់រាល់ការធ្វើអាជីវកម្មលើចិញ្ចើមផ្លូវសាធារណៈ ដោយរុះរើ តូបលក់ដូរ និងសម្ភារៈគ្រប់ប្រភេទ ចេញពីចិញ្ចើមផ្លូវសាធារណៈ ជាពិសេស ត្រូវដក និងកាត់ ចេញនូវស្លាកយីហោ ដែលដាក់នៅលើចិញ្ចើមផ្លូវសាធារណៈ ចាប់ពីថ្ងៃជូនដំណឹងនេះតទៅ ។ និងទី៣ ក្នុងករណី មិនអនុវត្តតាមការណែនាំ សាលាខណ្ឌសែនសុខ នឹងចាត់វិធានការរដ្ឋបាល ចុះរៀបចំសណ្តាប់ធ្នាប់ របៀបរាបរយសាធារណៈ ដោយមិនទទួលខុសត្រូវរាល់ការខូចខាតបាត់បង់ទ្រព្យសម្បត្តិ សម្ភារៈ និងផលប្រយោជន៍របស់បងប្អូនឡើយ៕