ភ្នំពេញៈ នៅវេលាថ្ងៃទី៨ តុលា មុននេះ លោកកុយ ស៊ីឌឿន ម្ចាស់ផលិតកម្មឌីភី និងជាក្រុមប្រឹក្សារបស់សមាគមសិល្បករខ្មែរ ព្រមទាំងភរិយា បានដឹកនាំតារាសិល្បៈជាច្រើនរូប រួមមានអ្នកនាង ចាន់ តារាទី អ្នកស្រីហែម សុវណ្ណ និងក្រុមការងារមួយចំនួនចុះចែកសៀវភៅ ប៊ិច សម្ភារៈសិក្សា មី ទឹកត្រី អង្ករ និងថវិកា ជូនដល់ក្មេងកំព្រា និងបុគ្គលិករបស់មណ្ឌលកុមារកំព្រា នៅគៀនឃ្លាំងប្រមាណជាង៦០នាក់។

លោកកុយ ស៊ីឌឿន បានអះអាងថាជារឿងរាល់ឆ្នាំ លោកមិនដែលភ្លេចរឿងចែកអំណោយ ដល់ក្មេងៗកំព្រា និងចាស់ៗ ស្នាក់នៅក្នុងមណ្ឌលគៀនឃ្លាំងនោះទេ ដោយសារតែលោកកាលពី អតីតកាល ក៏ធ្លាប់អាស្រ័យនៅក្នុងមណ្ឌលនោះ មុនក្លាយខ្លួនជាសិល្បករ និងជាម្ចាស់មុខជំនួញធំដុំ។ លោកថាក្នុងមួយឆ្នាំៗ លោករមែងដឹកនាំតារាសិល្បៈមកសំណេះសំណាល និងច្រៀងលេងបង្កភាពស្និទ្ធស្នាល ជាមួយក្មេងៗនៅមណ្ឌល និងបានចំណាយថវិកា ជូនក្មេងៗទាំងនោះដើរកម្សាន្តនោះផង។

ជាក់ស្ដែងសម្រាប់សិស្សរស់នៅ​ក្នុងមណ្ឌល ដែលខ្វះខាតថវិកាបង្កការសិក្សា ឬអត់ការងារធ្វើ គឺលោកតែងតែជួយដោះស្រាយ ដើម្បីបង្កឱកាសដល់ពួកគេ។ លោកថាការប្រគល់អំណោយដល់ក្មេងៗ នៅថ្ងៃទី៨ តុលានេះ គឺជាថវិកាផ្ទាល់របស់លោក និងក្រុមការងារ​ ។ ក្នុងនោះ ក្រៅពីប្រគល់អំណោយដល់ក្មេងៗ រស់នៅមណ្ឌលទាំងអស់ លោកក៏បានប្រគល់អង្ករ៥បាវ មី៥កេស និងថវិកាទ្រទ្រង់ដល់មណ្ឌលមួយចំនួនផងដែរ ៕