កណ្តាល: មនុស្ស០៤នាក់រងរបួសធ្ងន់ និងស្រាល ដោយសារបើកបរក្នុងស្ថានភាពស្រវឹងបានបុកគ្នាចំយ៉ាងពេញទំហឹង បណ្តាលឲ្យរងរបួសធ្ងន់ និងស្រាល០៤នាក់ ទាំងសងខាង។

ហេតុការណ៍គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង០៩ និង៥៣នាទីយប់ ថ្ងៃទី០៩ ខែតុលា ឆ្នាំ២០១៦ នៅលើកំណាត់ផ្លូវជាតិលេខ០២ ស្ថិតក្នុងភូមិព្រែឬស្សី សង្កាត់ក្រពើហារ ក្រុងតាខ្មៅ។

បើតាមសមត្ថកិច្ចចរាចរណ៍បានប្រាប់ឲ្យដឹងថា ជនរងគ្រោះទី០១មានឈ្មោះ លុយ វិឆៀវ ភេទប្រុស អាយុ១៨ឆ្នាំ មុខរបរជាងដែក ទី០២ឈ្មោះ លុយ វិឆយ័ ភេទប្រុស អាយុ២១ឆ្នាំ មុខរបរជាងដែក ទី០៣ឈ្មោះអារុណ រស្មី ភេទស្រី អាយុ ១៩ឆ្នាំ មុខរបរកម្មកររោងចក្រ អ្នកទាំង០៣នាក់ មានទីលំនៅភូមិព្រែកហូរលិច ឃុំព្រែកហូរ ក្រុងតាខ្មៅ និងទី០៤ឈ្មោះ សាំ វណ្ណ: ភេទប្រុស អាយុ៣៥ឆ្នាំ មានទីលំនៅភូមិព្រែកឡុង សង្កាត់តាក្តុល ក្រុងតាខ្មៅ។
បើតាមសាក្សីនៅក្បែរកន្លែងកើតហេតុបានឲ្យដឹងថា មុនពេលកើតហេតុគេឃើញបុរសម្នាក់ឈ្មោះ ស៊ាំ វណ្ណ: បានបើកបរម៉ូតូម៉ាក ស៊ីធី ផ្លាស់ ពណ៌ក្រហមគ្មាន ពាក់មួកសុវត្ថិភាព គ្មានដាក់កញ្ចក់ (ល្មើសច្បាប់ចរាចរណ៍) ក្នុងល្បឿនលឿនក្នុងស្ថានភាពស្រវឹងជោគជាំ ពីទិសដៅពីត្បូង ទៅទិសខាងជើង លុះដល់ចំណុចកើតហេតុខាងលើ ក៏បានបត់ឆ្វេង រួចក៏ជ្រុលទៅបុកម៉ូតូម៉ាកសង់សេ១២៥ ពណ៍ខ្មៅ ស៊េរីឆ្នាំ២០១៣ ពាក់ស្លាកលេខ ភ្នំពេញ 1BQ.0789 ជិះគ្នា០៣នាក់ បើកបរបញ្ច្រាសទិសគ្នាពីទិសខាងជើង ទៅទិសខាងត្បូង បណ្តាលឲ្យផ្លោកខ្ទាតទប់ទៅនិងផ្លូវថ្នល់ រងរបួសបែកក្បាលហូរឈាមសន្លប់០១នាក់ និង០៣នាក់ទៀត រងរបួសធ្ងន់ និងស្រាល។

ភ្លាមៗនោះត្រូវបានកម្លាំងជំនាញចរាចរណ៍ក្រុងតាខ្មៅមកដល់កន្លែងកើតហេតុ ធ្វើការវាស់វែង និងយកម៉ូតូទាំងពីគ្រឿងទៅរក្សាទុកនៅអធិការដ្ឋាននគរបាលក្រុងតាខ្មៅ ដើម្បីរង់ចាំការដោះស្រាយនៅពេលក្រោយ។

សមត្ថកិច្ចចរាចរណ៍បានបញ្ជាក់ថា ករណីគ្រោះថ្នាក់ចរាចរណ៍នេះ បង្កឡើងដោយអ្នកបើកម៉ូតូស៊ីធីផ្លាស់ បើកបរក្នុងស្ថានភាពស្រវឹង គ្មានកញ្ចក់ គ្មានពាក់មួកសុវត្ថិភាព(ល្មើសច្បាប់ចរាចរណ៍)៕