ភ្នំពេញ: ក្មេងប្រុសម្នាក់ ត្រូវបានកម្លាំងនគរបាលធ្វើការចាប់ឃាត់ខ្លួនបន្ទាប់ពីត្រួតពិនិត្យរកឃើញថ្នាំញៀនជាច្រើនកញ្ចប់នៅជាប់នឹងខ្លួន ។ ការចាប់ខ្លួននេះបានធ្វើឡើងកាលពីវេលាម៉ោង១១និង២៥នាទី យប់ថ្ងៃទី៩ ខែតុលា ឆ្នាំ២០១៦ ស្ថិតនៅចំណុចម្តុំរោងចក្រឆ្នាំង តាមបណ្តោយផ្លូវរថភ្លើង ក្រុមទី១០៦ ភូមិ២៣ សង្កាត់បឹងកក់ទី២ ខណ្ឌទួលគោក រាជធានីភ្នំពេញ។

នគរបាលខណ្ឌទួលគោក បានឲ្យដឹងថា ក្មេងប្រុសដែលជនសង្ស័យខាងលើនេះ មានឈ្មោះ បាន សុខគឿន ហៅ គឿន ភេទប្រុស អាយុ១១ឆ្នាំ មុខរបរមិនពិតប្រាកដ ស្នាក់នៅផ្ទះជួលមុខវត្តនាគវ័ន្ត ផ្លូវលេខ១៣២ សង្កាត់ស្រះចក ខណ្ឌដូនពេញ។ ក្នុងនោះដែរ វត្ថុតាងដែលសមត្ថកិច្ចដកហូតបានរួមមាន ក្រាមពណ៌សថ្លាដែលសង្ស័យជាសារជាតិញៀនចំនួន២៤ថង់តូច រួមនឹងទូរស័ព្ទដៃចំនួន០២គ្រឿងម៉ាកណូគា ពណ៌ខ្មៅ ០១គ្រឿង និងម៉ាកសូនី ពណ៌ស ០១គ្រឿង។

សមត្ថកិច្ចបានបន្តឲ្យដឹងទៀតថា មុននឹងឈានដល់ការចាប់ខ្លួនបានជនសង្ស័យខាងលើ កម្លាំងនគរបាលខណ្ឌទួលគោក បានសហការជាមួយកម្លាំងកងអន្តរាគមន៍ពិសេសនិងកម្លាំងការិយាល័យព្រហ្មទណ្ឌកម្រិតធ្ងន់ចុះធ្វើការល្បាតក្នុងភូមិសាស្ត្រ លុះបានមកដល់ចំណុចម្តុំរោងចក្រឆ្នាំង ស្រាប់តែប្រទះឃើញក្មេងដែលជនសង្ស័យខាងលើកំពុងឈរ រេរ៉ ដោយមានការសង្ស័យ សមត្ថកិច្ចបានឃាត់ក្មេងប្រុសខាងលើដើម្បីត្រួតពិនិត្យនិងឆែកឆេរ ស្រាប់តែរកឃើញថ្នាំញៀនចំនួន២៤កញ្ចប់តូច នៅជាប់នឹងខ្លួនរបស់ក្មេងខាងលើ ទើបសមត្ថកិច្ចសម្រេចធ្វើការចាប់ឃាត់ខ្លួនតែម្តង ។ បច្ចុប្បន្នជនសង្ស័យរួមនឹងវត្ថុតាង ត្រូវបានសមត្ថកិច្ចឃុំខ្លួនបណ្តោះអាសន្ន នៅអធិការដ្ឋាននគរបាលខណ្ឌទួលគោក ដើម្បីកសាងសំណុំរឿងបន្តបញ្ជូនខ្លួនទៅកាន់តុលាការចាត់ការតាមផ្លូវច្បាប់ ៕