កណ្តាលៈ គ្រោះថ្នាក់ចរាចរណ៍ដ៍រន្ធត់មួយបានកើតឡើង បន្ទាប់ពីម៉ូតូ២គ្រឿងបើកបរក្នុងល្បឿនលឿន រេចង្កូតបុកគ្នាពេញទំហឹងបណ្តាលឲ្យមនុស្ស២នាក់ស្លាប់នៅនឹងកន្លែង និង២នាក់ទៀតរងរបួសធ្ងន់ត្រូវបានគេបញ្ជូនទៅសង្គ្រោះបន្ទាន់នៅមន្ទីរពេទ្យ។ ហេតុការណ៍នេះបានកើតឡើងកាលពីវេលាម៉ោង៦និង៣០នាទី ថ្ងៃទី៩ខែតុលា ឆ្នាំ២០១៦ ស្ថិតនៅលើបណ្តោយផ្លូវបេតុង ៧អិនជី ផ្លូវឆ្ពោះទៅកាន់ភូមិព្រែកលួង ចំណុចភូមិវិហារសួគ៌ ជើងឃុំវិហារសួគ៌ ស្រុកខ្សាច់កណ្តាល ខេត្តកណ្តាល។

សមត្ថកិច្ចបានឲ្យដឹងថា ជនរងគ្រោះទាំង៤នាក់ ទី១ឈ្មោះ សឿន ប៊ុននឿន ភេទប្រុស អាយុ១៨ឆ្នាំ ស្នាក់នៅភូមិរកាទី១ ឃុំរកាជន្លឹង ស្រុកខ្សាច់កណ្តាល ខេត្តកណ្តាល រួមដំណើរជាមួយនិងជនរងគ្រោះទី២ឈ្មោះ រី ធារី អាយុ១៧ឆ្នាំ ស្នាក់នៅភូមិស្លែងឃុំជីបោល ស្រុកស្រីសន្ធរ ខេត្តកំពង់ចាម ជាម្ចាស់ម៉ូតូ។ ជនរងគ្រោះទី៣ឈ្មោះ លន់ សុខលាង ភេទប្រុស អាយុ១៩ឆ្នាំ ស្នាក់នៅភូមិរាប ឃុំរាប ស្រុកពារាំង ខេត្តព្រៃវែង រួមដំណើរជាមួយនិងបុរសម្នាក់ទៀតមិនទាន់ស្គាល់អត្តសញ្ញាណ។

យោងតាមរបាយការណ៍របស់សមត្ថកិច្ចបានឲ្យដឹងថា មុនពេលកើតហេតុខណៈមេឃកំពុងតែធ្លាក់ភ្លៀងយ៉ាងខ្លាំងនោះ គេបានឃើញបុរសម្នាក់បើកម៉ូតូមួយគ្រឿងម៉ាកហុងដាសេ១២៥ ពណ៌ខ្មៅ ពាក់ស្លាកលេខ ភ្នំពេញ 1FQ-0946 ជិះឌុបនារីម្នាក់នៅខាងក្រោយដោយល្បឿនលឿន លុះបានមកដល់ចំណុចកើតហេតុខាងលើ ស្រាប់តែម៉ូតូបង្កបានរេចង្កូតមកខាងឆ្វេងដៃបុកជាមួយម៉ូតូម៉ាកម៉ាកហុងដាសេ១២៥ ពណ៌ខ្មៅ ស៊េរីឆ្នាំ២០០៨ ពាក់ស្លាកលេខ ភ្នំពេញ 1AC-4145 ដែលកំពុងជិះដោយយុវជន២នាក់ យ៉ាងពេញទំហឹង បណ្តាលឲ្យមានមនុស្ស២នាក់ស្លាប់នៅនឹងកន្លែងហូរឈាមពេញដងផ្លូវ និង២នាក់ទៀតរងរបួសយ៉ាងធ្ងន់ធ្ងរ ត្រូវបានគេបញ្ជូនទៅសង្គ្រោះបន្ទាន់នៅមន្ទីរពេទ្យ ។

ក្រោយពីហេតុការណ៍នេះបានកើតឡើង សមត្ថកិច្ចនគរបាលចរាចរស្រុកខ្សាច់កណ្តាល បានចុះមកធ្វើការពិនិត្យនិងវាស់វែងដល់កន្លែងកើតហេតុ ដោយបាននាំយកម៉ូតូទាំង២គ្រឿងយកមករក្សាទុកនៅអធិការដ្ឋាននគរបាលស្រុកខ្សាច់កណ្តាល ដើម្បីរង់ចាំធ្វើការដោះស្រាយគ្នាពេលក្រោយតាមផ្លូវច្បាប់។ ចំណែកសាកសពជនរងគ្រោះត្រូវបានសមត្ថកិច្ចប្រគល់ទៅឲ្យក្រុមគ្រួសារធ្វើបុណ្យតាមប្រពៃណី ៕