នៅទីបំផុត ឧកញ៉ាពីរដួង មាន លោក ហុង ពីវ និង លោក ឌួង ឆាយ បានសម្រេចចិត្តជួយដល់ ទារិកា មីមី ដែលមានអាយុ២ខែ កើតជំងឺប្រស្រីភ្នែកឡើងបាយ ប្រឈមនឹងមើលពិភពលោកនេះមិនឃើញ ជារៀងរហូត។

ពាក់ព័ន្ធនឹងជំងឺ ទារិកាមីមី នេះ គឺត្រូវធ្វើការវះដោះដូរកែវភ្នែក ដោយតម្លៃកែវភ្នែកម្ខាង ១៨០០ ដុល្លារអាម៉េរិក ហើយក៏ជាវិបត្តិ មួយ ដែលឪពុកម្តាយរបស់នាង គ្មានលទ្ធភាពណាមួយអាចជួយបាន មានតែពឹងទៅលើឧកញ៉ាពីររូបខាងលើ។
បើទោះបីជាយ៉ាងនេះក្តី វាសនា របស់ ទារិកា មីមី ហាក់មានសង្ឃឹមឡើងវិញ បន្ទាប់ពីលោក ឧកញ៉ា ហុង ពីវ បានផ្តល់ចម្លើយទៅកាន់សាធារណ:ជនថា លោកនឹងជួយដល់នាង ហើយនាំយកមកភ្នំពេញឆាប់ៗ ។

បន្ទាប់ពីសារព័ត៌មាន Post News ចុះផ្សាយនូវអត្ថបទ «សាវិន ហ្វីលីព៖ ២សប្តាហ៍ទៀត ទារិកាមីមី មើលលែងឃើញ ទ្វីបលោក សូមលោក ហុង ពីវ ជួយផង» ពេលនោះដែរ គេឃើញលោក ឧកញ៉ា បានចូលទៅ Comments ថា «I am Helping her now,She will be in Phnom Penh soon» ដែលមានន័យជាភាសាខ្មែរថា «ខ្ញុំកំពុងជួយនាង ហើយនាងនឹងមកភ្នំពេញឆាប់ៗនេះ» ។ ទន្ទឹមជាមួយគ្នានោះដែរ លោកឧកញ៉ា បានចូលទៅ Comments ទៀតថា «She will get help by me ,don’t worry» ប្រែថា«នាងនឹងទទួលបានការជួយពីខ្ញុំ កុំបារម្ភអី» ។

តារាសម្តែង សាវិន ហ្វីលីព ដែលជាស្ថាបនិកកុមារសាវិនកម្ពុជា បានឲ្យដឹងថា ក្រៅពីលោកឧកញ៉ា ហុង ពីវ ដែលព្រមជួយនោះ នៅមាន ឧកញ៉ា វ័យក្មេង ឌួង ឆាយ ក៏បានជួយដូចគ្នា ដោយបានឲ្យជំនួយការរបស់លោក ទាក់ទង​មកខ្លួនលោកផ្ទាល់តាមរយ:បណ្តាញសង្គមហ្វេសប៊ុក។

បន្ទាប់ពីបានទទួលនូវព័ត៌មាននេះឧកញ៉ា វ័យក្មេង ឌួង ឆាយ បានសរសេរនៅលើហ្វេសប៊ុកខ្លួនថា ថ្ងៃនេះជំនួយការរបស់ខ្ញុំបានជួបជាមួយគ្រួសារកុមារីមានវាសនាអភព្វដែលប្រស្រីភ្នែកឡើងបាយដើម្បីជួយស្វែងរកដំណោះស្រាយព្យាបាលជំងឺភ្នែករបស់គាត់ខ្ញុំបាទនឹងខិតខំប្រឹងប្រែងព្យាយាមទាក់ទងជាមួយវេជ្ជបណ្ឌិតជំនាញៗទាំងក្នុងនឹងក្រៅប្រទេសដើម្បីជួយព្យាបាលភ្នែករបស់គាត់ឲ្យបានជាសះស្បើយនឹងឆាប់បានមើលឃើញពិភពលោកនេះវិញឆាប់ៗព្រោះនៅសល់ពេលវេលាតែ២សប្តាហ៍ទៀតប៉ុណ្ណោះដើម្បីជួយឲ្យគាត់អាចមើលឃើញឡើងវិញ សូមបងប្អូនពូមីងជួយបួងសួងជូនពរឲ្យគាត់ទទួលការជោគជ័យនឹងឆាប់បានជាសះស្បើយផងណា សូមអរគុណ។

តួប្រុសក្នុងរឿង JailBreak បានបន្តថា សម្រាប់លោក ឧកញ៉ា ហុង ពីវ លោកមិនបានទទួលដំណឹងដោយផ្ទាល់ពីលោក ឧញ៉ានោះទេ តែគ្រាន់តែឃើញសារថាលោកនឹងជួយ បន្ទាប់ពីមានមិត្តភក្តិបងប្អូនក្នុងហ្វេសប៊ុក បាន កូពី Status របស់លោក ផ្ញើទៅកាន់ លោកឧញ៉ា ហើយគាត់ឆ្លើយដោយខ្លីថា គាត់នឹងជួយ ។

លោក សាវិន បានបន្តទៀតថា នៅមានមនុស្សជាច្រើនទៀត បានខលមកលោក ដើម្បីទាក់ទងជួយដល់ ទារិកាខាងលើ ក៏ប៉ុន្តែលោកបានឆ្លើយយ៉ាងខ្លីថា មានឧកញ៉ា ពីររូបខាងលើ បានជួយហើយ ពេលនោះលោកស្រក់ទឹកភ្នែក ដោយមិនដឹងខ្លួន ដោយមិននឹកស្មានថា មានមនុស្សច្រើនយ៉ាងនេះ គិតពីវាសនា ទារិកា ធឿន មីមី ដែលមានអាយុ ទើបតែ២ខែនោះ៕