ព័ត៌មានជាតិ

បើកម៉ូតូទៅបុកគូទរថយន្ដដឹកកម្មករបណ្តាលឲ្យដួលត្រូវរថយន្តមួយគ្រឿងទៀតកិនបែកក្បាលស្លាប់

កណ្តាល:គ្រោះថ្នាក់ចរាចរណ៍ដ៏រន្ធត់មួយ បានកើតឡើងបន្ទាប់ពីបុរសម្នាក់បានបើកម៉ូតូទៅបុកគូទរថយន្តដឹកកម្មករបណ្តាលឲ្យដួលស្របពេលមានរថយន្តមួយគ្រឿងទៀតកំពុងបើកកាត់ចាប់ហ្វ្រាំងមិនទាន់កិនអូស ជនរងគ្រោះបណ្តាលឲ្យធ្លាយខួរស្លាប់យ៉ាងអាណោចអាធ័មនៅលើដងផ្លូវ។ ហេតុការណ៍នេះបានកើតឡើងកាលពីវេលាម៉ោង ៦និង៤៥នាទី ព្រឹកថ្ងៃទី១០ ខែតុលា ឆ្នាំ២០១៦ ស្ថិតនៅចំណុចតាមបណ្តោយផ្លូវជាតិលេខ៤ ចន្លោះគីឡូមែត្រលេខ២០-២១ ក្នុងភូមិត្រពាំងក្រសាំង ឃុំ បែកចាន ស្រុកអង្គស្នួល ខេត្តកណ្ដាល។

សមត្ថកិច្ចនគរបាលចរាចរណ៍បានឲ្យដឹងថា ជនរងគ្រោះដែលត្រូវបានរថយន្តកិនស្លាប់ខាងលើនេះមានឈ្មោះ មួន ចន្ធី ភេទប្រុស អាយុ២៣ឆ្នាំ មុខរបរកម្មករ មានទីលំនៅភូមិ អន្លង់ស្វាយ សង្កាត់បឹងធំ ខណ្ឌពោធិសែនជ័យ រាធានីភ្នំពេញ។

យោងតាមរបាយការណ៍របស់សមត្ថកិច្ចបានឲ្យដឹងថា មុនពេលកើតហេតុគេបានឃើញ ជនរងគ្រោះបើកម៉ូតូមួយគ្រឿងម៉ាកXR ពណ៌ខ្មៅ ពាក់ស្លាកលេខ ភ្នំពេញ 1BU-1229 ធ្វើដំណើរតែម្នាក់ឯងក្នុងទិសដៅពីលិចទៅកើតដោយពុំមានពាក់មួកសុវត្ថិភាព លុះបានមកដល់ចំណុចកើតហេតុស្រាប់តែម៉ូតូជនរងគ្រោះបានបើកទៅបុកគូទរថយន្តដឹកកម្មករមិនចាំម៉ាកមួយគ្រឿងដែលកំពុងបើកបរក្នុងទិសដៅពីទិសខាងលិចទៅកើត បណ្តាលឲ្យដួលទៅលើដងផ្លូវស្របពេលនោះក៏មានរថយន្តមួយគ្រឿងទៀតម៉ាក ហ៊ីយ៉ាន់ដាយ ពណ៌ស ពាក់ស្លាកលេខ ភ្នំពេញ 3A-6369 បើកបរដោយបុរសម្នាក់មិនស្គាល់អត្តសញ្ញាណ ចាប់ហ្វ្រាំងមិនទាន់បានកិនចំក្បាលជនរងគ្រោះបណ្តាលឲ្យធ្លាយខួរស្លាប់នៅកន្លែងកើតហេតុតែម្តង។ បន្ទាប់មកអ្នកបើកបររថយន្តបង្កមិនព្រមបញ្ឈប់ល្បឿននោះទេ គឺបានបើករថយន្តគេចទៅមុខចម្ងាយ៧០០ម៉ែត្រទើបអែបខាងឈប់ រួចចុះរត់គេចខ្លួនបាត់តែម្តង។

ក្រោយពីហេតុការណ៍នេះបានកើតឡើង សមត្ថកិច្ចនគរបាលចរាចរណ៍ជំនាញ បានចុះមកធ្វើការពិនិត្យនិងវាស់វែងដល់កន្លែងកើតហេតុ ដោយបាននាំយកយានយន្ត ទាំង៣គ្រឿង យកមករក្សាទុកនៅអធិការរដ្ឋាននគរបាលស្រុកអង្គស្នួល ដើម្បីបន្តចាត់ការតាមនិតិវិធីច្បាប់៕

គ្រោះថ្នាក់ចរាចរណ៍

គ្រោះថ្នាក់ចរាចរណ៍

គ្រោះថ្នាក់ចរាចរណ៍

មតិយោបល់