ព្រៃវែងៈ បុរសម្នាក់ ដោយសារតែប្រញ៉ាប់ទៅបើកលុយ នៅរោងចក្រ 7NG បានបើកម៉ូតូលឿនដូចហោះ ក៏បណ្តាលឲ្យជួបគ្រោះថ្នាក់ចរាចរណ៍ជាមួយរថយន្តបាឡែន បណ្ដាលឲ្យបាក់ភ្លៅទាំងសងខាងដោយមើលទៅ មិនសង្ឃឹមរស់ឡើយ ចំណែកនារី ០២នាក់ដែលរួមដំណើរពីក្រោយ រងរបួសស្រាល។

ករណីនេះបានកើតឡើងកាលពីវេលាម៉ោង ១រសៀល ថ្ងៃទី១០ ខែតុលា ឆ្នាំ២០១៦ នៅចន្លោះគីឡូម៉ែត្រលេខ ៤៧-៤៨ លើផ្លូវជាតិលេខ៨ ស្ថិតនៅ ភូមិកំពង់ពពិល ឃុំកំពង់ពពិល ស្រុកពារាំង ខេត្តព្រៃវែង។

ប្រភពពីកន្លែងកើតហេតុបានឲ្យដឹងថា មុនពេលកើតហេតុគេឃើញ ម៉ូតូមួយគ្រឿង ម៉ាក C125 ពណ៌ខ្មៅពាក់ស្លាកលេខភ្នំពេញ 1BO 7028 បើកបរដោយឈ្មោះ អ៊ុន ភារុណ ភេទប្រុស អាយុ២០ឆ្នាំមានទីលំនៅភូមិព្រៃក្រឡាញ់ធំ ឃុំព្រៃស្រឡិត ស្រុកពារាំង ដែលមានទិសដៅពីកើតទៅលិចដោយឌុបនារី2នាក់ពីក្រោយក្នុងបំណងទៅបើកលុយនៅរោងចក្រ7NG យ៉ាងលឿនដូចភ្នែកបន្ទោលពេលមកដល់កន្លែងកើតហេតុ ម៉ូតូបានជ្រុលចង្កូត ទៅបុករថយន្តមួយគ្រឿងម៉ាក កាមម៉ារីបាឡែន ពណ៌ប្រផេះ ពាក់ផ្លាកលេខ ភ្នំពេញ 2Z 2095 បើកបរដោយឈ្មោះ សុខ ខុម ភេទប្រុសអាយុ៣៥ឆ្នាំ នៅភូមិក្រឡាមាឃ ឃុំត្នោត ស្រុកកញ្ជ្រៀច ខេត្តព្រៃវែង ដែលកំពុងធ្វើដំណើរបញ្ច្រាសទិសគ្នា យ៉ាងពេញទំហឹងលាន់សូរដូចរន្ទះបាញ់ បណ្តាលឲ្យអ្នកបើកបរម៉ូតូ ខាងលើ រងរបួសបាក់ភ្លៅទាំងសងខាងតែម្ដង ឯនារីរងគ្រោះដែលរួមដំណើរពីក្រោយចំនួន ០២នាក់នោះបានរងរបួសស្រាល។

ក្រោយពេលកើតហេតុ សមត្ថកិច្ចបានធ្វើការវាស់វែងដោយសន្និដ្ឋានថា ករណីនេះបង្កឡើងដោយម៉ូតូ បើកចូលគន្លងរថយន្ត ឯជនរងគ្រោះត្រូវបានសង្គ្រោះនិង បញ្ជូនទៅមន្ទីរពេទ្យឯភ្នំពេញ ចំណែកវត្ថុតាងត្រូវបានសមត្ថកិច្ច យកមករក្សាទុកនៅអធិការដ្ឋាននគរបាលស្រុកពារាំងរង់ចាំដោះស្រាយតាមនិតិវិធី៕