ភ្នំពេញៈ នាយឧត្តមសេនីយ៍ សុខ ផល អគ្គនាយកនៃអគ្គនាយកដ្ឋានអន្តោប្រវេសន៍ បានប្រាប់ Post News តាមទូរស័ព្ទនៅយប់ថ្ងៃទី១០ ខែតុលា ឆ្នាំ២០១៦នេះថា សមត្ថកិច្ចពាក់ព័ន្ធទាំងអស់រួមមានទាំងអគ្គស្នងការនគរបាលជាតិ និងអគ្គនាយកដ្ឋានអន្តោប្រវេសន៍ កំពុងចាត់វិធានការតាមចាប់ទណ្ឌិតឈ្មោះ សោម ឯក ដែលបានរត់គេចពីពន្ធនាគារ PJ។

ថ្លែងប្រាប់ Post News នាយឧត្តមសេនីយ៍ សុខ ផល មានប្រសាសន៍ថា «ទាំងអគ្គស្នងការដ្ឋាននគរបាលជាតិ ទាំងអគ្គនាយកដ្ឋានអន្តោប្រវេសន៍ បានធ្វើការរាំងស្កាត់នៅតាមច្រកព្រំដែន»។ លោកបន្តថា ទណ្ឌិតឈ្មោះ សោម ឯក បានរត់ចេញពីការឃុំខ្លួន កាលពីវេលាម៉ោង ១១យប់ ថ្ងៃទី០៩ ខែតុលា នាយឧត្តមសេនីយ៍បញ្ជាក់ថា ទណ្ឌិត សោម ឯក គឺធ្វើពុតជាឈឺ ហើយឆ្លៀតឱកាសរត់គេចខ្លួន គ្រាដែលអនុរក្សពន្ធនាគារបញ្ជូនមកមន្ទីរពេទ្យរុស្ស៊ី។

ពាក់ព័ន្ធនឹងករណីរត់គេចខ្លួននេះ អគ្គនាយកដ្ឋានពន្ធនាគារ សហការជាមួយ អគ្គស្នងការដ្ឋាននគរបាលជាតិ កំពុងធ្វើការស្រាវជ្រាវ ដើម្បីតាមចាប់ អ្នកទោសឈ្មោះ សោម ឯក ហៅ ជា គឹមហ៊ួន ដែលជាអតីតទាហានចូលបំរើការនៅក្រសួងការពារជាតិ តាំងពីឆ្នាំ១៩៧៩ រហូតដល់ឆ្នាំ២០០៣ មកដាក់ពន្ធនាគារវិញ។

លោក សោម ឯក ត្រូវបានតុលាការ កាត់ទោសឲ្យជាប់ពន្ធនាគារសរុបចំនួន៤៦ឆ្នាំ។ ក្នុងនោះករណីទី១ ពីបទបង្កើតចលនាកងទ័ពក្បាលខ្លា ដោយខុសច្បាប់ ដែលត្រូវតុលាការផ្តន្ទាទោសដាក់ពន្ធនាគារចំនួន១៨ឆ្នាំ និងមួយករណីទៀត ពីបទបំផ្ទុះគ្រាប់ធ្វើភេវរកម្ម នៅមុខក្រសួងការពារជាតិ កាលពីថ្ងៃទី៧ ខែមករា ឆ្នាំ២០០៩ ដោយតុលាការផ្តន្ទាទោស ឲ្យជាប់ពន្ធនាគារចំនួន២៨ឆ្នាំ។

បញ្ហារត់គេចខ្លួននេះ មន្ដ្រីអនុរក្សពន្ធនាគារPJ ២នាក់ ដែលមានការធ្វេសប្រហែសធ្វើឲ្យអ្នកទោស ឈ្មោះ សោម ឯក ដែលជាមេក្លោង បង្កើតចលនាខុសច្បាប់ មានទិសដៅចង់ផ្ដូរលំរាជរដ្ឋាភិបាល មានឱកាសរត់គេចខ្លូន ពីមន្ទីរពេទ្យរស្ស៊ីនោះ ក៏កំពុងស្ថិតក្រោមការស៊ើបអង្កេតផងដែរ៕