បាត់ដំបង: នៅថ្ងៃទី១៣ ខែតុលា ឆ្នាំ២០១៦ វេលាម៉ោង៥ និង២០នាទីល្ងាច នៅចំណុចខាងលិចវត្តអូរស្បៃកព្រើស ស្ថិតក្នុងភូមិស្ពានទំនាប ឃុំបួរ ស្រុកភ្នំព្រឹក ខេត្តបាត់ដំបង មានករណីគ្រោះថ្នាក់ចរាចរមួយបាន កើតឡើងបង្កដោយរថយន្តម៉ាកកាមរី ពណ៌ស្ក ពាក់ស្លាកលេខភ្នំពេញ 2Q:6874 បើកបរដោយជនមិនស្គាល់ឈ្មោះ (បានរត់គេចខ្លួនបាត់) បើកបរពីទិសខាងកើតមក ទិសខាងលិច បានគេចពីម៉ូតូមួយគ្រឿងដែលបើកបរស្របទិសគ្នា រួចក៏បុកម៉ូតូ០១គ្រឿងទៀតនៅខាងមុខដែលមានម៉ាក ស៊ុយសូគី គ្មានស្លាកលេខ បើកបរពីទិសខាងលិចទៅកើតបណ្ដាលឲ្យស្លាប់ជនរងគ្រោះជិះម៉ូតូចំនួន ០២នាក់។

ជនរងគ្រោះដែលជិះម៉ូតូនោះ ទី១.ឈ្មោះ ព្រឿង ហ៊ីង ភេទស្រី អាយុ៤៧ឆ្នាំ ស្លាប់នៅកន្លែងកើតហេតុ និងទី២. ឈ្មោះ ជា មុំ ភេទស្រី អាយុ២៣ឆ្នាំ រងរបួសធ្ងន់ ក្រោយមកស្លាប់ពេលបញ្ជូនទៅដល់មន្ទីពេទ្យ ជនរងគ្រោះទាំង២នាក់ រស់នៅភូមិ-ឃុំកើតហេតុខាងលើ។

ក្រោយពីសម្ថកិច្ចយើងធ្វើការវាស់វែងកន្លែងកើតហេតុរួច បានយករថយន្ត និងម៉ូតូមករក្សាទុកនៅប៉ុស្តិ៍នគរបាលរដ្ឋបាលបួរ រង់ចាំដោះស្រាយតាមនីតិវិធីច្បាប់ និងបន្តស្រាវជ្រាវរកអ្នកបើកបររថ្តយន្តដើម្បីយកមកផ្តន្ទាទោសតាមច្បាប់ ចំណែកសាកសពជនរងគ្រោះបានប្រគល់ឲ្យសាច់ញាតិយកទៅធ្វើបុណ្យតាមប្រពៃណី៕