កណ្តាលៈ បុរសម្នាក់ខណៈកំពុងតែជិះកង់ម្នាក់ឯងសុខៗ ក៏ស្រាប់តែដួលផ្កាប់មុខស្លាប់ក្នុងទឹកចិញ្ចើមផ្លូវភ្លាមៗ កាលពីវេលាម៉ោង ៥និង៤០នាទី ថ្ងៃទី១៤ ខែតុលា ឆ្នាំ២០១៦ នៅចំណុចចិញ្ចើមផ្លូវ មុខដីចម្ការ ក្នុងភូមិកោះរះលើ ឃុំកោះរះ ស្រុកល្វាឯម ខេត្តកណ្តាល។

សមត្ថកិច្ចបានឲ្យដឹងថា ជនរងគ្រោះមានឈ្មោះ អ៊ែល រតន: ហៅ ឆក ភេទប្រុស អាយុ 22ឆ្នាំ មុខរបរកសិករ (មានជម្ងឺឆ្កួតជ្រូក) ទីលំនៅបច្ចុប្បន្ន ក្នុងភូមិកោះរះលើ ឃុំកោះរះ ស្រុកល្វាឯម ខេត្តកណ្តាល។ សមត្ថកិច្ចបានបញ្ជាក់ថា ជនរងគ្រោះមានជម្ងឺប្រចាំកាយ(ជម្ងឺឆ្កួតជ្រូក)ដោយឧស្សាហ៍ប្រកាច់់ជាញឹកញាប់ ។ មុនពេលកើតហេតុ ជនរងគ្រោះបានប្រាប់ឪពុកថាខ្លួនទៅបង់សំណាញ់នៅចំណុចស្ពានផ្លូវទៅភូមិព្រែកក្មេង ដោយជិះកង់មានសំណាញ់ដាក់ក្នុងធុងស្ពេត្រូចេញពីផ្ទះទៅដល់ចំណុចកើត ហេតុក៏ដួលកង់ប្រកាច់នៅក្នុងទឹកភក់ក្បែរចិញ្ចើមផ្លូវតែម្តង ពេលនោះអ្នកភូមិចេញទៅចងគោបានឃើញជនរងគ្រោះ ដួលផ្កាប់មុខក្នុងទឹកភក់ក៏ជួយលើក តែជនរងគ្រោះបានស្លាប់បាត់ទៅហើយ ។

កំលាំងប៉ុស្តិ៍កោះរះ បានពិនិត្យឃើញថា ជនរងគ្រោះពិតជាបានស្លាប់ដោយសារដួលប្រកាច់(ឆ្កួតជ្រូក)ថប់ដង្ហើមក្នុងទឹកភក់ពិតប្រាកដមែន ។ ក្រោយពេលពិនិត្យរួច ក៏ប្រគល់សាកសពជូនឈ្មោះ ជឿន សំអ៊ែល ត្រូវជាឪពុកបង្កើតយកទៅធ្វើបុណ្យតាមប្រពៃណី៕