ភ្នំពេញៈ ក្រុមវិស្វករនាំមុខផ្នែកធារាសាស្រ្ត (World Bank) ដឹកនាំដោយលោក Joop Stoutjesdijk នៅថ្ងៃនេះ បានបង្ហាញពីលទ្ធផលនៃការចុះសិក្សាពីស្ថានភាពប្រព័ន្ធធារាសាស្រ្តខ្នាតតូច មធ្យម និងខ្នាតធំ នៅតំបន់ជុំវិញបឹងទន្លេសាប ជូនលោក វេង សាខុន រដ្ឋមន្រ្តីក្រសួងកសិកម្ម រុក្ខាប្រម៉ាញ់និងនេសាទ ដើម្បីស្នើសុំការណែនាំពីក្របខណ្ឌយុទ្ធសាស្រ្តសម្រាប់វិស័យធារាសាស្រ្តកម្ពុជា។

លោក Joop Stoutjesdijk បានមានប្រសាសន៍ថា “ប្រព័ន្ធដែលលោកបានចុះពិនិត្យនោះ មានសក្តានុពលខុសៗគ្នា ហើយបច្ចុប្បន្ន ស្ថានភាពនៃការគ្រប់គ្រងប្រព័ន្ធទាំងនោះ ទាមទារឲ្យមានការសហការរវាងប្រជាពលរដ្ឋ អាជ្ញាធរមូលដ្ឋាន និងស្ថាប័នពាក់ព័ន្ធ ក្រសួងកសិកម្ម រុក្ខាប្រមាញ់និងនេសាទ និងក្រសួងធនធានទឹកនិងឧតុនិយម អាចសហការគ្នា ក្នុងការគ្រប់គ្រងប្រព័ន្ធធារាសាស្រ្តខ្នាតតូចនិងមធ្យម ដោយធ្វើការផ្ទេរការគ្រប់គ្រងប្រព័ន្ធខ្នាតតូចទៅថ្នាក់មូលដ្ឋាន ជាពិសេសកសិករឬសហគមន៍”។

តំណាងWorld Bank រូបនេះបានបញ្ជាក់ពីការគ្រប់គ្រងប្រព័ន្ធធារាសាស្រ្តខ្នាតធំ គឺមានលក្ខណៈធំធេង និងមានភាពស្មុគ្រស្មាញ ដូច្នេះនាពេលអនាគត រាជរដ្ឋាភិបាលគួរពិចារណា សហការជាមួយវិស័យឯកជន ក្នុងការគ្រប់គ្រងប្រព័ន្ធធារាសាស្រ្តខ្នាតធំទាំងនោះ ដើម្បីធានាប្រសិទ្ធភាពក្នុងកិច្ចដំណើរការប្រព័ន្ធ និងមាននិរន្តភាព។

ពាក់ព័ន្ធទៅនឹងរបកគំហើញរបស់តំណាងធនាគារពិភពលោក ក្នុងការផ្ទេរការគ្រប់គ្រងប្រព័ន្ធធារាសាស្រ្តខ្នាតធំទៅកាន់វិស័យឯកជន លោក វេង សាខុន មានប្រសាសន៍ថា “នេះជាកត្តា ចាំបាច់មួយ ដែលជាឱកាសសម្រាប់វិស័យឯកជនក្នុងការវិនិយោគលើវិស័យកសិកម្ម ដើម្បីធានានូវគុណភាព និងបរិមាណនៃផលិតផលកសិកម្ម សម្រាប់បំពេញតម្រូវការទីផ្សារ ហើយវិស័យឯកជនអាចមានសមត្ថភាពគ្រប់គ្រាន់ក្នុងការដំណើរការគ្រប់គ្រង និងបែងចែកប្រព័ន្ធទាំងនោះបានល្អ ព្រោះថាវិស័យឯកជនអាចមានលទ្ធភាពក្នុងការប្រើប្រាស់ និងចាត់ចែងធនធានមនុស្សបានគ្រប់គ្រាន់”។

លោករដ្ឋមន្រ្តីបញ្ជាក់ថា ចំពោះការគ្រប់គ្រងប្រព័ន្ធខ្នាតតូច និងមធ្យម ក្រសួងកសិកម្ម រុក្ខាប្រមាញ់ និងនេសាទ មានបំណងសហការជាមួយ ក្រសួងធនធានទឹកនិងឧតុនិយម ជំរុញការសហការរវាង សហគមន៍កសិករប្រើប្រាស់ទឹក និងសហគមន៍កសិកម្ម ដើម្បីឈានទៅធ្វើការគ្រប់គ្រងនូវប្រព័ន្ធទាំងនោះ ប្រកបដោយប្រសិទ្ធភាព៕