ភ្នំពេញៈ មន្ទីរសាធារណការ និងដឹកជញ្ជូនរាជធានីភ្នំពេញ បានរៀបចំដាក់ពង្រាយបង្គន់អនាម័យចំនួន៤២២បង្គន់ទៅតាមគោលដៅ ដែលបានកំណត់ដើម្បីត្រៀមទទួល និងជួយសម្រួលដល់ប្រជាពលរដ្ឋដែលអញ្ជើញចូលរួមក្នុងព្រះរាជពិធីព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុកឆ្នាំ២០១៦នេះ។ ចំណែកកម្មករប្រមាណ២៩០នាក់ ក៏នឹងដាក់ប្រចាំការ ដើម្បីបោសសម្អាត និងប្រមូលសំរាមតាមសួនច្បារ ក្នុងពិធីនេះផងដែរ។

មន្ត្រីរដ្ឋបាលរាជធានីភ្នំពេញបានឲ្យដឹងថា ក្នុងព្រះរាជពិធីបុណ្យអំទូកខាងមុខនេះ មន្ទីរបានត្រៀមរៀបចំដាក់បង្គន់អនាម័យពង្រាយនៅតាមដងផ្លូវសាធារណៈ និងតំបន់ជំវិញមាត់ទន្លេទាំងត្រើយខាងលិច និងខាងកើត ពិសេសនៅតាមសួនច្បារនានា ដើម្បីទទួលប្រជាពលរដ្ឋដែលអញ្ជើញមកទស្សនា និងកំសាន្តក្នុងព្រះរាជពិធីបុណ្យអុំទូក។ បង្គន់អនាម័យដែលត្រៀមដាក់ពង្រាយនោះមានចំនួន៤២២បង្គន់ ក្នុងនោះមានបង្គន់ថ្មដែលមានស្រាប់ បង្គន់ចល័ត និងបង្គន់ជីកដី ដែលត្រូវបានដាក់ពង្រាយនៅ សួនមុខដអរិយក្សត្រ សួនខាងត្បូងក្រុមសម្តេចឪ សួនក្រមង៉ុយ សួនមុខវត្តបុទុមវតីទីលានប្រជាធិបតេយ្យ សួនសម្តេចហ៊ុនសែន សួនមហោស្រពមុខរដ្ឋសភា សួនមុខវត្តលង្កា សួនមាត់ទន្លេ ជាប់របងខាងលិចវាលព្រះមេរុ សួនឆ្នេរទន្លេ សួនខាងជើងផ្សារចាស់ សួនកុមារវត្តភ្នំ សួនច្បារមុខCDC ក្នុងបរិវេណសាលចតុមុខ គល់ស្ពានភ្លោះកោះពេជ្រ សួនខាងត្បូងសាលាចតុមុខ ក្នុងបរិវេណផ្សាររាត្រី សួនមុខទូតបារាំង សួនមុខសូគីម៉ិចឫស្សីកែវ និងបង្គន់ជីករណ្តៅសម្រាប់កីឡាករអុំទូកនៅជ្រោយចង្វារត្រើយខាងកើតមានចំនួន២០០បង្គន់ផងដែរ។

មន្ត្រីដដែរក៏បានបញ្ជាក់ថា ក្រៅពីរៀបចំបង្គន់អនាម័យខាងលើនេះ មន្ទីរក៏បានដាក់ពង្រាយ ប្រព័ន្ធភ្លើងចម្រុះពណ៌នៅតាមដើមឈើ និងបង្គោលភ្លើង សម្រាប់លម្អ និងបំភ្លឺក្នុងរាជធានីឲ្យបានច្រើនថែមទៀត ដើម្បីជួយលើកសោភ័ណភាពទីក្រុងឲ្យសាកសមនឹងព្រះរាជពិធី និងតាមផែនការណែនាំរបស់គណៈកម្មាធិការជាតិរៀបចំបុណ្យក៏ដូចជារដ្ឋបាលរាជធានីភ្នំពេញតែម្តង។

មន្ត្រីអង្គភាពសួនច្បារ និងរុក្ខជាតិរាជធានីភ្នំពេញ បានឲ្យដឹងថា ព្រះរាជពិធីព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុកឆ្នាំ២០១៦នេះ អង្គភាពបានរៀបចំកម្លាំងប្រចាំការសម្រាប់បោសសម្អាត និងប្រមូលសំរាមតាមសួនច្បារមានចំនួន២៩០នាក់ ដោយចាប់ផ្តើមបោសសម្អាតចាប់ពីម៉ោង១១យប់រហូតដល់ម៉ោង៨ព្រឹក និងបានត្រៀមសម្ភារៈគ្រប់គ្រាន់រួចហើយ។ ក្នុងការងារបោសសម្អាតនោះ អង្គភាព បានត្រៀមកម្មករសម្រាប់បោសមានចំនួន១៧៧នាក់ កម្មករកើបសំរាម រថយន្ត៧គ្រឿងអ្នកបើកបរ១០នាក់ កម្មករសម្អាតបង្គន់៣០នាក់ និងសន្តិសុខសួនមានចំនួន២០នាក់ផងដែរ។

សូមបញ្ជាក់ថា ព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុកឆ្នាំនេះ មានរយៈពេល៣ថ្ងៃ ដែលនឹងប្រព្រឹត្តទៅចាប់ពី ថ្ងៃទី១៣-១៤ និងថ្ងៃទី១៥ វិច្ឆិកា ឆ្នាំ២០១៦៕