ភ្នំពេញៈ តាំងពីលោកវរសេនីយ៍ត្រី ចាប វុទ្ធី នាយការិយាល័យផែនការ នៃមន្ទីរប្រតិបត្តិការអាវុធហត្ថរាជធានីភ្នំពេញ បានទទួលអនិច្ចកម្មទៅកាលពីថ្ងៃទី២៣ ខែមិថុនា ឆ្នាំ២០១៦ លោកស្រី ឡឹង ស៊ីវន ជាប្រពន្ធឋិតក្នុងវ័យ៥០ឆ្នាំ ហាក់អស់សង្ឃឹមក្នុងជីវិតគិតអ្វីលែងចេញ។ ណាមួយខ្លួនមេម៉ាយ ណាមួយស្នាក់នៅផ្ទះជួល ណាមួយទទួលបន្ទុកមើលថែរកូន៤នាក់ដែលមានវ័យក្មេងខ្ចី។

ឃើញដូច្នេះ ឧត្តមសេនីយ៍ឯក រ័ត្ន ស៊្រាង មេបញ្ជាការរង កងរាជអាវុធហត្ថលើផ្ទៃប្រទេស និងជាមេបញ្ជាការកងរាជអាវុធហត្ថ រាជធានីភ្នំពេញ បានផ្ចុងផ្តើមគំនិត ឲ្យលោកស្រីរកមុខរបរចិញ្ចឹមជីវិត ដោយលោក ជាអ្នកទំនុកបំរ៉ុង ទើបលោកស្រី សម្រេចចិត្តរើសមុខរបរលក់ទឹកអំពៅ។

នៅថ្ងៃទី១៨ ខែតុលានេះ លោក រ័ត្ន ស៊្រាង បានឧបត្ថម្ភម៉ូតូមួយគ្រឿង រទេះទឹកអំពៅស្វ័យប្រវត្តិមួយ ធុងទឹកកកធំមួយ សម្រេចតាមបំណងលោកស្រី ឡឹង ស៊ីវន ដើម្បីយកទៅប្រកបរបរចិញ្ចឹមជីវិត ធានាដល់អនាគតកូនៗកម្សត់ទាំង៤៕