ភ្នំពេញៈ យោងតាមការបង្ហោះខ្លឹមសារភ្ជាប់ជាមួយនិងរូបភាព តាមគណនីបណ្តាញសង្គមហ្វេសប៊ុក ផ្ទាល់ខ្លួនរបស់ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានបង្ហាញឲ្យដឹងថា ខណៈពេលនេះ សម្តេច បានធ្វើដំណើរទៅដល់ អតីតតំបន់ប្រយុទ្ធដ៏ក្តៅគគុកហើយ ។

ដោយការបង្ហោះរបស់សម្តេច តាមបណ្តេញសង្គមនោះ មានខ្លឹមសារ ដូចតទៅ« ពេលនេះ ខ្ញុំកំពុងស្ថិតក្នុងស្រុកម៉ាឡៃ នៃខេត្តបន្ទាយមានជ័យ។ ដំណើរបស់ខ្ញុំឆ្ពោះទៅកាន់ខេត្តប៉ៃលិន ដែលនឹងត្រូវធ្វើដំណើរឆ្លងកាត់ស្រុកកំរៀង ស្រុកសំពៅលូនស្រុកភ្នំព្រឹកនៃខេត្តបាត់ដំបង តាមផ្លូវជាតិលេខ៥៩ ដែលភ្ជាប់ពីផ្លូវជាតិលេខ៥មកប៉ៃលិនមានចំងាយជាយ២០០គម ។ រូបថតដែលខ្ញុំបានថតនេះ គឺនៅលើផ្លូវលេខ៥៩ ពេលព្រឹកនៅលើទឹកដីម៉ាឡៃ។ គោលដៅប្រែក្លាយតំបន់អតីតសមរភូមិទៅជាទីផ្សារ និងតំបន់អភិវឌ្ឍន៍ក្រោមនយោបាយ ឈ្នះ -ឈ្នះ បាន និងកំពុងក្លាយជាការពិតហើយ។ តំបន់ទាំងនេះហើយដែលខ្ញុំ និងសហការីបានយកជីវិតដូរយកសន្តិភាពបន្ទាប់ពីអ៊ុនតាក់ (UNTAC) ដកចេញដោយបន្សល់ទុកឱ្យកម្ពុជាមួយមានតំបន់ត្រួតត្រា២ និងបន្តសង្គ្រាមមិនឈប់ឈរ»។

ក្នុងខ្លឹមសាររបស់សម្តេច បានបន្តទៀតថា « សូមអរគុណបងប្អូនជនរួមជាតិដែលបានគាំទ្រនយោបាយ ឈ្នះ-ឈ្នះ និងបានរួមដំណើរជាមួយខ្ញុំក្នុងការថែរក្សាសន្តិភាពនិ ងការអភិវឌ្ឍកន្លងមក»៕