ភ្នំពេញ: អគ្គនាយកដ្ឋានលំនៅឋាន នៃក្រសួងគ្រប់គ្រងដែនដី នគរូបនីយកម្ម និងសំណង់ និង អង្គការលំនៅឋានមនុស្សជាតិកម្ពុជា (HFHC) នៅថ្ងៃទី១៩ ខែតុលា ឆ្នាំ២០១៦ បានចុះ MOU គាំទ្រការអនុវត្តគោលនយោបាយជាតិស្តីពីលំនៅឋាននៅកម្ពុជា និងប្រកាសផែនការជំរុញកម្មវិធីនានាដែលនឹងបង្កើនលំនៅឋាន និងការកាន់កាប់ប្រកបដោយសុវត្ថិភាពក្នុងពិធីប្រារព្ធទិវាលំនៅឋានពិភពលោក។

លោកស្រី ប៊ឺណាដេត បូឡូ ឌ្យូធី នាយកប្រចាំប្រទេសនៃ(HFHC)លើកឡើងថា “ក្នុងអំឡុងពេលប៉ុន្មានឆ្នាំចុងក្រោយនេះ យើងបានមើលឃើញកំណើនប្រជាជនខ្ពស់ និង កំណើនអត្រាចំណាកស្រុកទៅកាន់ទីក្រុង ដែលជាហេតុធ្វើឲ្យកម្ពុជាមានតម្រូវការទៅលើលំនៅឋានកាន់តែខ្ពស់។ ស្ថានភាពនេះ ប៉ះពាល់ខ្លាំងលើគ្រួសារដែលមានប្រាក់ចំណូលទាប និងមធ្យម”។ ក្នុងនាមជាអង្គការរកដំណោះស្រាយលំនៅឋានពិភពលោក និង អង្គការលំនៅឋានមនុស្សជាតិកម្ពុជាបានឆ្លៀតឱកាស ដើម្បីធ្វើការសហការជាមួយអគ្គនាយកដ្ឋានលំនៅឋាន ដើម្បីជួយសម្រួលការមានលំនៅដ្ឋាន កែលម្អសម្រាប់ប្រជាពលរដ្ឋទីក្រុងដែលកំពុងកើនឡើងនៅកម្ពុជា។

លោកចាន់ សាផាន រដ្ឋលេខាធិការក្រសួងដែនដីនគររូបនីយកម្ម និងសំណង់មានប្រសាសន៍ថា “ការចុះអនុស្សារណយោគយល់គ្នានេះ គឺជាកាលានុវត្តភាពថ្មីមួយទៀត ក្នុងការចូលរួមចំណែកអនុវត្តគោលនយោបាយស្តីពីលំនៅឋាន និងសារាចរលេខ០៣ ស្តីពីការដោះស្រាយសំណង់បណ្តោះអាសន្នលើដីរបស់រដ្ឋ ដែលត្រូវបានទន្រ្ទានកាន់កាប់ដោយខុសច្បាប់តាមរាជធានី ទីក្រុង និងទីប្រជុំជនឲ្យកាន់តែមានប្រសិទ្ធភាព”។

សូមបញ្ជាក់ថា គោលនយោបាយជាតិស្តីពីលំនៅឋានឆ្នាំ២០១៤ ដែលអនុម័តដោយរាជរដ្ឋាភិបាលបានចែងថា ប្រជាជនគ្រប់រូបមានសិទ្ធិមានលំនៅឋានសមរម្យ ដែលជាផ្នែកមួយនៃសិទ្ធិមានជីវភាពគ្រប់គ្រាន់ ធានាបាននូវការរស់នៅក្នុងភាពជាឯកជននៃគ្រួសារ និងសុវត្ថិភាពក្នុងការកាន់កាប់លំនៅឋានស្របច្បាប់។ ចក្ខុវិស័យនៃគោលនយោបាយជាតិស្តីពីលំនៅឋាន គឺសំដៅធ្វើឲ្យប្រជាជនទូទាំងប្រទេសមានលំនៅឋានសមរម្យ អាចរស់នៅបានប្រកបដោយសុខុមាលភាព សុវត្ថិភាព និងសេចក្តីថ្លៃថ្នូរ ជាពិសេសប្រជាពលរដ្ឋដែលមានប្រាក់ចំណូលមធ្យម ប្រាក់ចំណូលទាប និងក្រុមជនងាយរងគ្រោះ៕