ភ្នំពេញៈ កម្លាំងនគរបាលខណ្ឌសែនសុខចុះបង្ក្រាបក្មេងប្រើប្រាស់គ្រឿងញៀន បានចំនួន១៦នាក់ ក្នុងនោះស្រី២ ព្រមទាំងដកហូតបានថ្នាំញៀន៦កញ្ចប់តូច និងសម្ភារៈសម្រាប់សេពមួយចំនួន កាលពីម៉ោង១២និង៣០នាទីថ្ងៃត្រង់​ ទី២១តុលា ឆ្នាំ២០១៦នៅចំណុចផ្លូវលំ ក្រុម១០ ភូមិត្រពាំងឈូក សង្កាត់ទឹកថ្លា ខណ្ឌសែនសុខ។

ក្នុងប្រតិបត្តិការបង្ក្រាបទីតាំងខាងលើនេះ ដឹកនាំដោយ លោកម៉ក់ ហុង អធិការខណ្ឌសែនសុខ លោក គួក សុខហួរ អធិការរងខណ្ឌនិងដោយមានការសម្របសម្រួលពីលោក សេង ហ៊ាង ព្រះរាជអាជ្ញរងនៃអយ្យការអមសាលារាជធានីភ្នំពេញ។

លោក ម៉ក់ ហុង អធិការខណ្ឌ មានប្រសាសន៍ថា ដោយមានបទបញ្ជាពីលោកអគ្គស្នងការរង និងជាស្នងការរាជធានីភ្នំពេញ បានបញ្ជាមកលោក ឲ្យចុះសហការ និងធ្វើប្រតិបត្តិការណ៍នៅចំណុចខាងលើដែលជាតំបន់ស្មុកស្មាញ ទើបលោកដឹកនាំកម្លាំងចុះមកបង្ក្រាប ក្នុងនោះឃាត់ខ្លួនក្មេងៗដែលតែងតែដើរចោលផ្ទះ និងប្រមូលផ្តុំគ្នាប្រើប្រាស់គ្រឿងញៀនបានចំនួន១៦នាក់ និងដកហូតសម្ភារៈប្រើប្រាស់គ្រឿងញៀនមួយចំនួន។

បច្ចុប្បន្ន ក្រុមប្រើប្រាស់គ្រឿងញៀន រួមទាំងវត្ថុតាងត្រូវបាននាំខ្លួនយកទៅធ្វើការសាកសួរនៅអធិការដ្ឋាននគរបាលខណ្ឌសែនសុខ៕