ភ្នំពេញៈ នារីម្នាក់ស្រវឹងធ្លាក់ភ្នែក បានបើករថយន្តលុចស៊ីស GS៣០០មួយគ្រឿង បោះពួយរេពេញផ្លូវហើយក៏ទៅបុករះរនាំងដែកពុះចែកទ្រូងផ្លូវអស់១៥ផ្ទាំងបាក់រាយប៉ាយពេញ ហើយក៏ជ្រុលទៅបុករ៉ឺម៉កម៉ូតូកង់បី២គ្រឿងទៀតខ្ទេច រួចហួសទៅគៀបនឹងដើមឈើទាល់តែទៅមុខលែងរួច ទើបលែងបង្កគ្រោះថ្នាក់តទៅទៀត។ ហេតុការណ៍គ្រោះថ្នាក់ចរាចរណ៍ខាងលើនេះ បានកើតឡើងកាលពីវេលាម៉ោង១០និង៤៥នាទីយប់ ថ្ងៃទី២៤ ខែតុលា ឆ្នាំ២០១៦ នៅចំណុចមុខក្រុមហ៊ុនឆ្នោត LOTTERIA តាមបណ្តោយផ្លូវព្រះមុនីវង្ស ស្ថិតក្នុងសង្កាត់បឹងរាំង ខណ្ឌដូនពេញ។

ប្រភពព័ត៌មានដែលឃើញហេតុការណ៍បានឲ្យដឹងថា មុនពេលកើតហេតុគេឃើញរថយន្តម៉ាក លុចស៊ីស GS៣០០ ពាក់ស្លាកលេខ ភ្នំពេញ 2Q -7908 បើកដោយនារីម្នាក់ ប្រហែលជាស្រវឹងធ្លាក់ភ្នែក បើកតាមបណ្តោយផ្លូវព្រះមុនីវង្សពីត្បូងទៅជើងក្នុងល្បឿនយ៉ាងលឿន ពេលមកដល់ចំណុចមុខក្រុមហ៊ុនឆ្នោត LOTTERIA បានបុកគម្របលូ រួចបុករះរនាំងដែកពុះចែកទ្រូងផ្លូវបាក់អស់១៥ផ្ទាំង ធ្លាយពីម្ខាងទៅម្ខាងទៅបុករ៉ឺម៉កម៉ូតូកង់បី ដែលឈប់ចតលើចិញ្ចើមផ្លូវ២គ្រឿងទៀតបណ្តាលឲ្យខូចខាតខ្ទេច ហើយរថយន្តគៀបជាប់ដើមឈើទៅមុនលែងរួច សំណាងមិនបណ្តាលឲ្យនរណាម្នាក់រងរបួសនោះទេ ហើយបន្ទាប់ពីបង្កហេតុនារីម្ចាស់រថយន្តបានចុះពីលើរថយន្តគេចខ្លួនបាត់។

ប្រភពព័ត៌មានបានបន្តទៀតថា បន្ទាប់ពីកើតហេតុសមត្ថកិច្ចបានចុះវាស់វែង និងស្ទូចយករថយន្តបង្ក និងរ៉ឺម៉កម៉ូតូកង់បីដែលខូចខាតទៅរក្សាទុកនៅការិយាល័យចរាចរណ៍ផ្លូវគោករាជធានីភ្នំពេញ រង់ចាំដោះស្រាយនាពេលក្រោយ៕