ភ្នំពេញ: បុរសម្នាក់បានផឹកស៊ីជាមួយមិត្តភក្តិថ្ងៃទី៣នៃពីធីបុណ្យអុំទូក ស្រវឹងឃើញគេកំពុងឡើងចជិះរថយន្តរបស់គេ ស្មានថាគេជិះរថយន្តរបស់ខ្លួន ខណ:ដែលបុរសរូបនោះ កំពុងម៉ូតូក៏ស្ទុះទាញគេចុះពីលើរថយន្តវិញ បណ្តាលឲ្យដាច់ខ្សែរកមាស ត្រូវបានម្ចាស់ខ្សែរក ប្តឹងសមត្ថកិច្ចឲ្យចាប់ឃាត់ខ្លួន ។

ហេតុការណ៍នេះបានកើតឡើងកាលពីវេលាម៉ោង ៩និង៤០នាទី យប់ថ្ងៃទី១៥ ខែវិច្ឆិកា ឆ្នាំ២០១៦ ស្ថិតនៅតាមបណ្ដោយផ្លូវព្រះមុន្នីរ៉េតក្នុងភូមិទ្រា សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ ។

ជនរងគ្រោះដែលត្រូវជនសង្ស័យឆក់ខ្សែករមានឈ្មោះ រិន ប៊ុនណា ភេទប្រុស អាយុ២៨ឆ្នាំ មានមុខរបរលក់ដូរនៅផ្ទះ ស្នាក់ភូមិចុងថ្នល់ខាងលិច សង្កាត់ទឹកថ្លា ខណ្ឌសែមសុខ ដោយមានប្រពន្ធឈ្មោះ ហ៊ឹន ធានី អាយុ២៨ឆ្នាំ ស្នាក់ជាមួយគ្នា។ចំណែកជនសង្ស័យមានឈ្មោះ បាន រ៉ាវុត ភេទប្រុស អាយុ៤០ឆ្នាំ មុខរបរជាបុគ្គលិកអង្គការសង្គមស៊ីវិល ស្នាក់នៅច្បារអំពៅ។

បើតាមសម្ដីពីជនរងគ្រោះឈ្មោះ រិន ប៊ុនណា បានឲ្យដឹងថា នៅល្ងាចថ្ងៃកើតហេតុរូបគាត់បាននាំក្រុមគ្រួសារមកហូបស៊ុបនៅហាង ហេង ហេង២ លុះដល់ម៉ោងកើតហេតុខាងលើក្មួយរបស់គាត់បានងងុយដេក គាត់ក៏បានយកក្មួយមកដេកក្នុងរថយន្ត ពេលនោះ ស្រាប់តែមានជនសង្ស័យបានជិះម៉ូតូមាកលែត ពណ៌ស ពាក់ស្លាកលេខ ភ្នំពេញ 1CG-6768 មិនដឹងថាមកពីណានោះទេ ស្រាប់តែមកច្របាច់ករហើយបានឆក់ខ្សែករពីគាត់បណ្ដាលឲ្យដាច់ រួចនិយាយថា អ្ហែងចូលឡានអញធ្វើអី ហើយនៅពេលនោះបានសន្តិសុខជួយឃាត់ និងរាយការណ៍មកសមត្ថកិច្ចប៉ុស្តិ៍នគរបាលស្ទឹងមានជ័យ ប៉ុន្តែដោយសារតែជនសង្ស័យមានស្ថានភាពស្រវឹងខ្លាំងទើបលោក មៅ សាវឿន ដែលជានាយប៉ុស្តិ បានឲ្យបងប្អូនធានាចាំព្រឹកឡើងចាំដោះស្រាយគ្នា។ លុះដល់ព្រឹកឡើងភាគីទាំងសងខាងចរចាគ្នានៅប៉ុស្តិ៍រដ្ឋបាលសង្កាត់ស្ទឹងមានជ័យដោយសារតែជនរងគ្រោះរងគ្រោះទាសំណងចំនួន១ពាន់ដុលា្លរ តែជនសង្ស័យមានលុយតែ១៥០០០រៀល៕